Footer

Hunta probinsial, makipartisipar iti Concert at Plaza Salcedo

VIGAN CITY – No mabukel daytoy nga in-inawen dagiti kameng ti hunta probinsial, iti umuna a gundaway, makita dagiti umili ditoy ti mailinglinged a talento dagiti agtuturayda iti tay-ak ti musika.

Naammuan ti Tawid News Magasin nga iti pannakaangay ti umuna nga Ilocos Sur Festival, sinuratan ni Gov. Deogracias Victor “DV” Savellano dagiti kameng ti sangguniang panlalawigan ket inawisna ida tapno makipartisiparda iti aktibidad inton Enero 30.

Iti daytoy a petsa, maangay ti Concert at Plaza Salcedo a pannakaipabuya dagiti lokal a talento a pakairamanan dagiti adda iti takem iti probinsia. Kaarngi daytoy ti Concert at the Park iti Manila a pakaipabuyaan dagiti sala, kanta ken dadduma pay.

Kinuna ni Vice Gov. Jeremias “Jerry” Singson a no makabukelda, addanto met partisipasionda iti nasao a konsierto.

Nadakamat ti bise gobernador a miembro ni Bokal Jose Bonuan iti maysa a banda idi kabambannuaganna, nalaing nga aggitara ken tumatapat ni Bokal Peter Manzano, ken nalaing nga agkanta ni Bokala Chuchi Purisima.

Maysa met a drummer iti kombo idi kabambannuaganna ni Singson ket kameng iti JCS Rockers Band.

Selebraran ti Ilocos Sur ti maika-190 nga anibersario ti panagwaywayasna a probinsia  manipud Enero 27 agingga iti Pebrero 3 daytoy a tawen.

Naisina ti Ilocos Sur manipud iti Ilocos Norte idi Pebrero 2, 1818.

Karaman kadagiti aktibidad iti Ilocos Sur Festival dagiti sumaganad: Enero 27 – Horse Racing; Enero 28 – 10 a.m.,Trade Fair, 2 p.m., Kultura Ilocano Grand Parade, 8 p.m.,Talent portion ti Miss Ilocos Sur; Enero 29 – Delphic games; Enero 30 – Concert at Plaza Salcedo; Enero 31 – NGO/PO Day – a.m., traditional games, night, zarzuela; Peb. 1 – Bituen iti Ilocos; Peb. 2 – Koronasion ti Miss Ilocos Sur; ken Peb. 3 – Parangal ng Kapitolyo a pannakapadayaw dagiti Ilocos Surians a nagballigi iti propesionda.#

Comments are closed.