Footer

252 nga PNCOs naingato iti ranggoda

CAMP ELPIDIO QUIRINO, Bantay, Ilocos Sur -Naingato ti ranggo ti 14 a police commissioned officers (PCOs) ken 252 a police non-commisssioned officers (PNCOs) ti Ilocos Sur Police Provincial Office itay nabiit.

Karaman dagiti naital-o a 14 a PCOs manipud iti ISPPO da P/Supt. James Mangili, P/Supt. Adolfo Rafanan, PCI Jomar Labiano, PSI Rodrigo Rimando, PSI Sosimo Racho, PSI Fernando Ricaña, PSI Eduardo Rudio, PSI Cipriano Rafanan, PSI Simon Damolkis, PSI Juanito Cabang, PSI Roy Rafanan, PI Placido Alcausin, PI Rosario Ramos, ken PI Manuel Viaje.

Nagsapata dagitoy iti Camp Crame iti naangay a programa para iti pannakaital-oda.

Naangay met itay Enero 16 ditoy ti mass oathtaking dagiti PCNOs ket ni Governor Deogracias Victor “DV” Savellano ti namagsapata kadagiti naipromot. 

Karaman ditoy ti 160 a PO2 a naital-o a PO3, 78 a PO3 a naipromot nga SPO1, 5 nga SPO1 a nagbalin nga SPO2, 5 a dati nga SPO2 a naingato iti SPO3, ken uppat a sigud nga SPO3 a nagbalin nga SPO4.

Iti panagsarita ni Savellano, kinablaawanna dagiti naital-o a polis a nagkunaanna a deserving amin dagitoy ta napagtalinaedda ti linak ken talna iti sibubukel a probinsia.

Inkari ti gobernador ti panangnayon ti opisinana iti P600,000 ti P400,000 nga asset ti ISPPO tapno agbalin a maysa a milion.

Innayonna a mangibaon iti taga-Provincial Engineering Office a mapan mangkita iti paset ti kampo a pakaipasdekan iti canteen ti PNP kas pangsuporta ti administrasionna iti kapolisan ti Ilocos Sur.#

Comments are closed.