Footer

AWAN TI KAS NAALUMAMAY (Maudi iti Dua a Paset)

Kaudian, insan, a kumentarioak ti langenlangenyo kadagiti nabati a kakaduam iti opisinayo. Kasla awan man ti mangpagpaguni kenka, insan. Sada la ukapen ti ngiwatda no adda saludsodem a sungbatanda wenno adda  ipakaammoda kenka. Iti ababa a pannao, nalamiisda kenka, insan. Apay, dimo aya mapaliiw? Wenno awan ti bibiangmo iti garawda? Wen, a ta mayat met ti patangan ken kinnatawada no is-isuda. Sagpaminsan pay agiinnarasaasda ket suspetsak a sika ti nalimed a pagpapatanganda.

Rumbeng ngamin, insan, a balansiem ti amin. Dimo mabalin a kuestionaran ta taom nga agkaraladaw no uray sika ket aramidmo met. Makipatangka a nasayaat, saan ket a binubugkaw tapno respetuendaka. Aysus, insan, nasayaat a no dida guyguyaban wenno laylayatan ta liklikudam. Adda posibilidadna nga aramidenda dayta kenka ta didaka met kabaelan iti sangonsango agsipud ta bukodam met ida nga alunosen. Ken no adda pagsayaatan, kitaem, insan, ta nasayaat ti bingay. Saan a ti dakkel ti kukuam  ket ti laeng maregmeg ti ipuruakmo kadakuada.

Narigat met ket ti mangidaulo, insan. Rumbeng a nga ammom a sanguen ti nadumaduma a klase ti tao, kasta met ti kaririknada. Apay, dimo ya naadal dayta iti subjectmo idi a Psychology? Sapay no dimo sangkakuna a nalpasmo ti masters degree iti Public Administration. Ipakatmo a, insan, dagiti naadalmo ta saan nga umanay ti puro laeng teoria.

Isu met ket a diakon nagsubli idi ta kasta ti nakitak a sitwasionyo dita. Isu nga inanusak pay laeng ti nagbalin nga assistant ni Amang iti taltalon agingga nga innalanak ni Apo Mayor a kas dianitor ditoy munisipio.

Adu koma pay ti kayatko a binsabinsaen, insan, ngem masapul nga igibuskon toy suratko ta amangan no maladawak iti trabahok ket ungtannak tay kinkinse ti darana a hepe ti General Service Office. Sapay la koma, insan Memong, ta agpanunotka. Narigat ti hayblad. Kunada man a basbassit ti mapagkutim a muscles no umisemka maikumpara iti nakamisuotka nga arigna masiluanen ti kaatiddog ta sungom. Malaksid iti dayta, umadu pay ti magayyemmo. No ngay maatakeka, di pay nabalon a dina oras ni ipag Masing? Ket uray kasanonton ti panagpungtotmo no “makitkitam” ti pananglalailo ni kompadrem a Juaning kenkuana, ay, awanton ti maaramidam pay. Isu nga ita ta nasapa pay, agpanunotkan. Awan ti kasamayan a wagas ti pannakikadua wenno panangilawlawag iti aniaman a banag no di ti pannakisao iti naalumanay.

 

                                                                                                 Toy mangikaluya kenka,

               

                                                                                                  Insan Bionic

P.S.

Dika unay agpulpulotan iti azucena, insan, ta napudot ti bagi ti karnet’ aso. Amangan no isu pay ti maysa a gapu ti kinamanagpupudotmo.#

Comments are closed.