Footer

Balasitang, ginandat nga italaw dagiti kumaw

SINAIT, Ilocos Sur – Kumaw wenno panagkidnap? Ania man kadakuada, nagtignay ti sangguniang bayan ditoy tapno mapakalma ti amak dagiti nagannak kalpasan ti naipadamag a dandani pannakaitalaw ti maysa a balasitang nga agbasbasa iti sekundaria ditoy.

Pinaayaban ni Vice Mayor Edgar Yabes ni Chief of Police Senior Inspector Alexander Aurelio ket pinennekna no pudno ti damag nga adda “nakumaw” a balasitang ken no ania ti aksion ti kapolisan mainaig iti daytoy agwarwara a damag a nangited iti amak kadagiti nagannak.

Pinatalgedan ni Aurelio ti damag a maysa a 13 ti tawenna nga estudiante nga agbasbasa iti Sinait National High School ti dandani nakidnap ti dua a lalaki.

Iti report ni Aurelio, kinunana nga agawiden ti balasitang manipud iti pagadalan ket magmagna iti Barangay Macabiag idi nagsardeng iti likudna ti Sarao a dyip a kolor berde, dua a lalaki ti dimsaag sada ginammatan ti estudiante.

Gapu iti panagikkis ti balasitang, dinagdagus dagiti lallaki ti naglugan iti dyip sada naglibas.

Kanaig daytoy, indagadag ni Yabes ti panangiwayat dagiti polis iti naing-inget a panagpatroliada ken iti pannakitaripnongda kadagiti barangay officials iti binulan a mitingda tapno maipakaammoda dagiti programa ti kapolisan ditoy.

Daytoy ti umuna a report ti panaggandat nga agkidnap ditoy probinsia ita a tawen.

Idi Disiembre 10 idi napan a tawen, pinanggep ti grupo dagiti lallaki a mapapati a kameng ti kidnap gang ti maysa a balasitang nga estudiante iti Ag-agrao High School, Sta. Maria, Ilocos Sur.

Saan a nagballigi ti panggep dagiti suspetsa gapu iti panaglaaw ti maysa a residente a nakakita iti napasamak.

Sakbayna, idi Disiembre 5, naireport a mapukpukaw ti maysa a 13-ti-tawenna a balasitang a taga-Silag, iti met laeng Sta. Maria, a mapapati a biktima ti panagkidnap.

Kinuna ni Aurelio nga ad-adda pay nga ingetanda ti checkpoint tapno malapdan ti iseserrek dagiti adda dakes a panggepda ditoy nga ili.#

Comments are closed.