Footer

MAYSA A TALDIAP ITI NAPALABAS (Maudi a Paset)

NO ADDA papananmi pakisalipan iti Math, Science ken dadduma pay a subjects, urnongennakami amin iti kuartomi ket agkukuyogkamin nga agturong iti pagadalan wenno distrito a pakisalipanmi. Iti pangngaldaw, makilanglang kadakami, ad-adda pay ketdi nga ipadigona ti balonna a sida kadakami. No aggawidkamin, sagaysaennakami nga itulod sakbay nga agawid.

Napaliiwko nga ammona nga itakderan ti adalanna. Iti maysa a pasalip a nakisalipan ti maysa a kaklaseak, naarus agsipud ta saan nga inawat dagiti judges ti sungbatna.

Timmakder ni Ma’am Buenavista ket nupay kinunana a pinal ti desision dagiti judges, impettengna a husto ti sungbat ti kaklaseanmi. Nagtungpalanna, inaklon dagiti judges ti sungbat ti kaklaseanmi.

Ngem maysa a bigat, saan a simrek ni Ma’am Buenavista iti klasemi. Sabali metten ti nangisuro kadakami. Nasdaawkami. Nagsaludsodkami iti kaklasemi nga asideg iti balayda. Nakitana kano nga agsibsibug iti mulada iti paraanganda.

Iti kabigatanna, naammuanmi laengen a naiyalis ni Ma’am Buenavista iti Nagsangalan Elem. School tapno agbalin a head teacher.

Idi agawidkami iti aldaw, nagtutulagkami nga agkaklasean nga agtarus iti Nagsangalan. Uray dagiti babbai, immanamongda amin.

Manipud iti Vigan Central School, nagnagnakami a napan iti Nagsangalan Elem. School. Aganay uppat a kilometro ti kaadayo ti pinagnami. Saanmi nga inkankano ti pudot ti init wenno ti bisinmi.

Pasado ala unan ti malem idi makagtengkami iti Nagsangalan Elem. School. Nadaripespeskami iti ling-et.

Nakigtot ni Ma’am Buenavista idi makitanakami. Sinabatnakami.

“Apayen nga immaykayo?” inamadna.

“Mailiwkami kenkan, Ma’am,” insungbatmi.

Saan a nakasungbat ni Ma’am Buenavista. Uray la nakalua idi maammuanna a saankami pay a nangan. Nangbaon iti gumatang iti tinapay iti tiangge iti asideg ti pagadalan.

“Maminsan pay, diyon ar-aramiden daytoy, wen?” impatigmaanna kadakami idinto a sangkapunasna ti nagsulian ti matana.

Gapu iti panaglanganmi amin iti klasemi, naipulongkami iti prinsipal. Napaayaban dagiti nagannakmi. Namnamaenmi lattan a maungtankami. Nakarkaro manen ti tigergermi ta kadua ti prinsipal ti district supervisor iti uneg ti opisinana.

“A, dagitoy gayam dagiti nagawol iti klaseda nga agbasbasa,” impasabat ti district supervisor.

Nagari ti ulimek. Nagdumogkami.

“Saan a nasayaat ti inaramidyo,” kinuna manen ti lakay a district supervisor sana tinaliaw dagiti dadakkelmi.

“Wen, ngarud, sir, dimi ninamnama nga aramidenda ti kasta,” kinuna ti maysa a nagannak.

Nagtungtung-ed ti superbisor idinto a sinaggaysanakami a minatmatan. Inuraymi laengen ti ablat dagiti sumaruno a balikasna.

Ngem naklaatkami iti kinaalumamay ti bosesna. “Ammok ken maawatak ti kaririknayo iti ipapanaw ni maestrayo.  Nasursuroyo nga impateg kas maikadua nga inayo. Ngem adda nangatngato a pagrebbengan a naipakumit kenkuana ket palubosanyo koma tapno agballigi iti direksion a turongenna.”

Awan latta ti naguni kadakami. Iti naganus a panunotmi, dimi nagaw-at ti kayat a sawen ti superbisor.

“Ala, pakawanenkayo ita,’ inggibus ti lakay, “ngem no ulitenyo pay, madusakayon! Maawatandak met laeng, ubbing?”

“Wen, sir,” naggigiddankami a simmungbat.

Nabayagen daydi. Nagretiron ni Ma’am Buenavista.

Sinursurotko ti dalan a naglasatanna. Manipud iti kina-head teacher, naital-o a principal I, principal II, district supervisor, sa division supervisor.

Nabayagen a diak nakita ni Ma’am Buenavista. Ngem dakkel ti imbatina kaniak ken dagiti kinaklaseak a pakalaglagipan.

Saanko nga ilibak a daydi pannakaiyopismi gapu iti panangsurotmi kenkuana iti nakaiyalisanna a pagadalan ti kangrunaan a nangbaliw iti kinataok, iti panirigak iti biag. Utangko kenkuana ti yanko ita.

Wen, no ania ti imulam, isu ti apitem. Ayat ti imburay ni Ma’am Buenavista iti puso ken panunotmi, ket dayta nga ayat ti nagbalin a paratignay a nangiduron kadakami a mangsarungkar kenkuana uray sirokenmi ti kainitan, mabisinan, aglangan iti klasemi, ken iti pannakadusami gapu iti inaramidmi.#