Footer

Nasapa unay a panagpolitika

APAGTAPOG pay la ti 2008, impasayagen da Sen. Mar Roxas III, Sen. Manny Villar, Sen. Panfilo Lacson ti panggepda a tumaray para iti kangatuan a puesto iti pagilian iti panagpipili inton 2010.

Napigsa met ti nagan ni Sen. Loren Legarda, Vice Pres. Noli de Castro idinto a maipalpalapayag nga interesado iti daytoy a posision da  Sen. Richard Gordon ken Makati Mayor Jejomar Binay, MMDA Chairman Fernando Agbayani ken Quezon City Mayor Feliciano Belmonte.

Impalagid met ni dati a Pres. Joseph Estrada ti panagkandidatona a para presidente no saan nga agsusurot ti oposision iti ipatakderda a kandidato.

Imyunay-unay pay ni Estrada a dina kayat a maulit ti napasamak idi 2004 a pannakaabak ni Fernando Poe, Jr. a gayyemna ken ni Pres. Gloria Arroyo gapu iti pannakabingay ti oposision.

Iti dayta nga eleksion, nagkandidato latta ni Sen. Lacson iti baet ti panangpadas dagiti lider ti oposision ti panagtipon ti puersada ken ni Poe.

Maibatay iti resulta ti eleksion, nangabak koma ti nalatak nga aktor no saan a nagtuloy ni Lacson agsipud ta nakagun-od daytoy iti nasurok a tallo million a butos. Nasurok laeng a maysa a million ti nangarusan ni Arroyo ken ni Poe iti baet dagiti alegasion nga adda naisayangkat a panagsuitik iti eleksion.

Ngem kuna dagiti managpaliiw iti politika a saan a mapagkaykaysa ni Estrada ti oposision agsipud ta adda bukod nga interes dagiti dadaulo dagiti partido a kritikal iti administrasion ni Pres. Arroyo.

Iti panirigan dagiti political analysts, ipaspasayag laeng ni Estrada dayta tapno maideldelna ni Sen. Jinggoy nga anakna para iti kinabise presidente.

Kuna met dagiti autoridad iti linteg a saan a mabalin ni Estrada ti agkandidato para presidente agsipud ta pawilan ti Konstitusion.

Makunami met: saan koma a nakaturong lattan ti mata dagiti politiko iti 2010. Adayo pay ti eleksion. Adu pay dagiti mapasamak sakbay a dumteng dayta a tiempo.

Kasayaatan ketdi ti panagtrabaho dagiti politiko para iti pagimbagan dagiti umili tapno mapalag-anan ti panagbiagda iti sanguanan ti manamnama nga ingangato latta dagiti tagilako iti panagpangato manen ti presio ti produkto ti petroleo iti world market.

Ta mapaliiw nga iti baet dagiti ibanbando ti administrasion a dakkel ti simmayaatan ti ekonomia iti pagilian, saan met nga agballatek kadagiti marigrigat nga umili. Mapaliiw ketdi a dagiti laeng babaknang ti ad-adda a mairanud iti isasayaat ti ekonomia, kas pinatalgedan ti maysa a surbey.

Saan koma a ti 2010 laengen ti  turong ti mata dagiti politiko, kas iti naabbongan a mata dagiti kabalio nga agguyguyod iti kalesa a saandan a makita ti adda iti sikiganda.#

Comments are closed.