Footer

EDITORIAL: Adda iti implementasion

Iti panagpangato ti presio ti lana, sumagmamano a sektor ken pakairamanan dagiti senador ti nangidagadag iti pannakaikkat iti value-added tax iti lana tapno saan a mapadagsenan dagiti marigrigat nga umili. Ta saan a malibak a kangrunaan a mapuntaan iti isusuyop ti presio ti lana dagiti marigrigat agsipud iti saan a malapdan a panagngina dagiti magatgatang.

Ngem marikna ti isusupiat ti Malakaniang, nangnangruna iti Department of Finance iti value-added tax iti lana agsipud ta agpukaw la ketdi ti gobierno iti mapattapatta a P54 billion manipud iti mapastrek iti nasao a buis.

Madakamat ditoy nga iti pannakayimplementar ti  VAT, nakapataud ti gobierno iti kanayonan a pundo a nagbalin a sur-ay tapno mapabassit ti depisit ti gobierno.

Kas reaksionna, insingasing ketdi ti Malakaniang ti panangipaayna iti mapastrek iti VAT iti lana iti serbisio publiko kadagiti marigrigat nga umili iti pagilian.

Kinuna ti Department of Finance a nasaysayaat nga amang a maited laengen ti mapastrek iti VAT iti lana iti serbisio kadagiti marigrigat ngem iti pannakaakkalna a  pagpukawan ti gobierno iti pamataudan iti pondona.

Mairaman ditoy ti pannakaited kadakuada iti serbisio babaen ti PhilHealth program, panangited iti subsidy iti bagas ken diskuento iti gasolina ken diesel kadagiti agpaspasada a lugan.

Umanamongkami iti daytoy a singasing ti Malakaniang agsipud ta kasapulan nga agkuti ti gobierno tapno maalay-ayan ti aniaman a dakes nga ibunga iti di magawidan a panagpangato ti presio ti lana iti sangalubongan.

 Ngem kasano kasigurado a  maiturong ti pondo para iti pannakatulong dagiti marigrigat a pamilia, a saan ket a sumrek iti bulsa dagiti aggamulo? 

Ti rigatna ngamin ta saan a mapunas dagiti alegasion iti kurapsion ken panagkunniber nga adda pakainaigan dagiti opisial iti agdama nga administrasion. Saantayon a dakamaten dagiti anomalia a nakaisawsawang dagiti sumagmamano nga opisial ti turay nga agingga ita ket awan pay ti naglawaganda.

Napintas ti singasing ti Malakaniang. Rebbengna laeng nga agtignay ti gobierno tapno maalay-ayan dagiti marigrigat nga umili iti manamnama a panagpangato ti presio dagiti magatgatang maigapu iti isusuyop ti presio ti lana iti sangalubongan.

Rumbeng laeng a mangiwayat ti gobierno kadagiti pannalaknib tapno masigurado a maited ti pondo manipud iti VAT ti lana iti serbisio publiko kadagiti marigrigat nga umili. Iti daytoy a panawen ti rigat,  kasapulan  nga iburay metten ti gobierno kadagiti marigrigat a kakailiantayo dagiti pagimbagan manipud iti VAT ti lana nga ibanbandona a nakaigapuan iti dakkel a simmayaatan ti ekonomia ti pagilian.#

Comments are closed.