Footer

Pilgrimage tourism, tawid a kultura, OTOP, naitandudo iti Kannawidan Ylocos Festival

VIGAN CITY – Kinuna ni Gov. Deogracias Victor “DV” Savellano a saan laeng a pannakaidur-as dagiti bukod a produkto dagiti nadumaduma nga ili iti Ilocos Sur no di pay ti pannakaitandudo ti tawid a kultura ken pilgrimage tourism ti naipangruna a panggep ti Kannawidan Ylocos Festival.

Kas panangitandudo iti pilgrimage tourism, naluktan ti festival a pangrambak iti maika-190 nga anibersario ti panagwayas ti Ilocos Sur a probinsia itay Enero 27 babaen ti maysa a misa a naangay iti Katedral ni San Pablo ken kalpasanna, nailibot dagiti nadumaduma a rebulto dagiti nalatak a patron dagiti ili iti probinsia a nakiprosisionan dagiti provincial officials, relihioso a grupo ken  deboto a katoliko.

Iti interbiona iti media, kinuna ni Savellano nga adu dagiti daan ken napnuan pakasaritaan a simbaan iti Ilocos Sur ket panggep ti festival nga ad-adu pay ti maawis a turista a bumisita iti probinsia babaen ti pilgrimage tourism.

Karaman dagiti nadakamat ni Savellano a napnuan historia ti St. Paul Metropolitan Cathedral ken Simbaan a Bassit ti Vigan City, ti Nuestra Seniora de la Caridad ti Bantay, ti Simbaan iti Sta. Lucia, San Vicente, ni St. William the Hermit iti Magsingal ken ti Shrine ni Santo Cristo iti Sinait.

Kas kannawidan, naluktan met ti trade and agri fair, itay Enero 28 babaen ti panaglualo ti maysa a panglakayen a kameng ti tribu ti Bago iti Quirino, Ilocos Sur a sinaruno ti pannakapuyot ti tangguyob a mangipakdaar iti panaglukat ti nasao a pagteng.

Kinuna ni Gov. Deogracias Victor “DV” Savellano a babaen met ti pannakalukat ti trade fair a pakaidispleyan dagiti partuat ken patanor dagiti nadumaduma nga ili iti probinsia, ad-adda pay a maipromot dagitoy nga agbalin a pamastrekan dagiti lokal a gobierno.

Iti malem, intampok dagiti nadumaduma nga ili, nangruna dagiti upland municipalities dagiti kannawidan nga ugali ken tradision iti lugarda babaen ti sala.

Kinuna ni Savellano a panggep ti gobierno probinsial a maikalkalawa pay ti festival iti sumaruno a tawen a pakaawisan a makipartisipar dagiti kabangibang ti Ilocos Sur a probinsia.

Maipalagip nga idi Peb. 2, 1818, naisina ti Ilocos Sur iti Ilocos Norte ken La Union tapno agbalin nga agwayas a probinsia.#

Comments are closed.