Footer

Ubing, natinnag iti salamagi

STA. Cruz, Ilocos Sur – Nablo iti saka ken nasugatan iti nadumaduma a paset ti bagi ti maysa nga ubing idi natinnag iti salamagi iti las-ud ti pagadalan  ti Barangay Besalan iti daytoy nga ili.

Nainagan ti ubing a ni Emil Richard Cortez, 8, Grade 2 iti Besalan Elementary School ken residente iti nasao met laeng a barangay.

Iti pulong ni Joan Cortez,  ina ti biktima, natinnag ti ubing iti immulianna a salamagi nga adda iti uneg iti pagadalanda.

Naitaray ti ubing iti Ilocos Research, Training and Medical Center idiay San Fernando La Union para iti pannakataming ti bullo ken sugatna.#