Footer

Naglua ti napudno a soldado ti pagilian (Maudi iti Dua a Paset)

Iti nasakit kadagiti amin a kasasakitan, naduktalan ti lidermi, (a maysa kadagiti uppat a nakalasat) a dagiti inaramat dagiti rebelde a bala ken paltog ket nagtaud iti mismo nga armada ti pagilian!

“Kadagiti  kampo a naribribbuotmi, nakatakuatkami latta kadagiti bala ken paltog nga aramat ti AFP.”

Naparupangetak. Adun dagiti damag iti diario ken iti telebision a kastoy.

“Timmaud ti adu a saludsod. Asinokami a soldado ti pagilian? Asino kadi dagiti kabusor ti pagilian? Saan laeng a dakdakami ti nakapasamakan iti kakastoy. Adu met a grupo. Saan laeng nga iti Marines no di pay iti army. Ket nagtitiponkami. Binukelmi ti pannakaadda koma ti timekmi nga agsaludsod no apay a dagiti bala ken paltog ti pagilian ket adda a mismo iti ima dagiti kabusor. Idinto ta sibubukelen ti timekmi, awan met ti dimngeg kadakami no di ket napabasolkami pay a sumursurot kadagiti nagkudeta. Nasurokkami a tallopulo a Marines manipud iti Basilan ti naibalud. Saan a patas ti gobierno kadagiti soldadosna.

“Saan a patas ti gobierno, kunak, ta minilmillion ti ibulbulsa dagiti nangangato nga  opisialmi, dagiti opisial ti gobierno, ngem kadakami nga  inaldaw a makipinpinnatay a mangsalsalaknib iti linak ken kappia, agkurkurangkami iti taraon, aruaten, bala, ken pudpod payen dagiti sapatosmi.

“Saanmi a maawatan no apay a ti agpaay koma a supply dagiti soldado ket adda iti ima dagiti kabusor. Saanmi a maawatan, kas iti kinaadu dagiti kakaduakon a natay.

Nagdumog, kinautna ti paniona ket pinunasna dagiti matana. Naulimek ti amin. Pinindotna ti keyboard. Naiparang iti puraw a board ti tumaytayab a kalapati ken nagdakkel ti naisurat a TRANQUILITY.

“Daytoy ti pudno a linak ken kappia, ti awan iti pinnatay. Ngem lapped iti linak ken kappia no addanto pay met laeng a nakatugaw dagiti rapas ti imana, dagiti dadakkel ti butitda, dagiti alimatek ken buaya iti takdang.

“Damagek kadakayo ita, sadino ti pagturongan ti pagiliantayo itan no ibasar iti nalabes unay a kurapsion iti agdama?

Natural, awan ti sumungbat. Ngem ania  ngata ti kayatna a paruaren, kunkunak laengen iti bagik.

“Agbasatayo a nasayaat tapno salbarentayo ti pagiliantayo iti masanguanan nga aldaw! Usarentayo dagitoy a maadaltayo para iti pagimbagan a mismo ti sapasap ken ti pagilian. Saluadantayo ti pagiliantayo! Saantayo a baybay-an a lamuten dagiti aso.  Awisek ken ibagak iti tunggal maysa kadakayo ita, no saantayo a salbaren ti pagilian, kakaasinto dagiti sumarsaruno a kaputotan, lalo dagiti agbalinto nga annaktayo!”

NO DADDUMA, adda dagiti karkarna a timek a dumteng. Uray no kunaen a naiyaw-awan a timek iti lugar a di ninamnama. Kas itoy a Marine  iti uneg ti eskuelaan. Ngem nabileg dagiti mensahe dagiti naiyaw-awan a timek. Kas iti aplaw ti angin a kumuldit.

Rumimbaw ket rumimbawto latta ti kinaimbag. Iti laksid ti  kinadakes, addanto latta  timek a rumuk-at ken rumkuas a mangidagadag iti nasken a panagridam ken panagsangga. Dagitoy a timek ket makatulongda iti gimong a paggargarawan dagiti bambanti ken bagiw.

Adun dagiti timek. Adu metten a timek ti naipatli. Ngem agingga nga adda latta dagitoy a managinkukuna a nakamaskara, saanto nga agpatingga ti proseso ti pananggaw-at iti linak ken kappia. Isu a nasken ti panagridam!#

Comments are closed.