Footer

Dagiti pagilasinan iti diding

NAPEKLAN a politiko ni dati a House Speaker Jose de Venecia ngem dina nasirok dagiti tignay dagiti kaaliado ni Pres. Arroyo a mangtippuog kenkuana iti puesto.

Posible nga adda naikiskissiim kenkuana ngem nagkammatalek iti pammatalged ni Pres. Arroyo a saan a nagbaliw ti relasionda iti baet ti alegasion ni Joey de Venecia nga anakna a bimmiang ni First Gentleman Miguel Arroyo iti National Broadband Network deal. No kastoy ti nagtaray iti panunot ni JDV, dakkel a biddut a posible a saannanton a pakabangonan iti politika.

Kitaentayo dagiti sumaganad:

* Iti eleksion idi 2007, nangipatakder ti Kampi a partido ni Pres. Arroyo iti kandidato a sumango ken ni De Venecia idinto a kameng iti koalision ti Kampi ken ti Lakas-NUCD a partido ni De Venecia.

* Pinadas a pinadisi ti maysa a kaaliado ni Pres. Arroyo ti puestona kas speaker iti panaglukat ti Kongreso kalpasan ti eleksion.

*Pimmanaw dagiti dua nga annak a diputado ni Pres. Arroyo iti Lakas ket timmiponda iti Kampi.

*Iti panangayab ni Pres. Arroyo kadagiti mayor, gobernador ken diputado iti nagsina a miting iti Malakaniang a mapapati nga adda pakainaigan iti manamnama a maidatag nga impeachment complaint maikontra iti Presidente, saan a napakaammuan ni De Venecia.

* Dagiti met la annak ni Pres. Arroyo ti nangidaulo iti tignay a mangpadisi kenkuana iti kina-speaker. 

Kabayatan dagitoy a pasamak, nagtalinaed ni De Venecia nga umap-apiring latta ken ni Pres. Arroyo, nagtalek iti pammatalged ti Presidente nga awan ti rikki iti relasionda.

Ngem idi Lunes, Pebrero 4, nagbitla ni De Venecia sana inakusaran ti asawa ni Pres. Arroyo ken dagiti annak daytoy nga adda iti likudan ti tignay a mangtippuog kenkuana.

Nagkuti ni De Venecia ngem naladawen. Nakasaganan dagiti kaaliado ni Pres. Arroyo, iggemdan ti numero, ket kasla ruting a naiwallages ni De Venecia iti puestona.

Ita, inakusaran ni De Venecia ni Presidente Arroyo iti kurapsion ken impalagidna nga adda dagiti pannakaammona mainaig kadagiti panagpanggep a panagsuitik iti eleksion idi 2004. Posible pay a tumiponen iti oposision ket agbalin a kritiko iti administrasion.

Apay nga ita laeng nga agtimek? 

Ngem daytoy ti agdadata a a kinapudno: iti politika, awan ti permanente a gayyem.#