Footer

Mabenepisiaran upland municipalities no maipasdek Bago province: mayor ti Suyo

SUYO, Ilocos Sur – Kinuna ni  Mayor Elpidio Bistoyong, Sr. a
mabenepisiaranda nga adda iti upland municipalities no maipatakder ti
probinsia dagiti Bago.

“Kayatmi la unay (Bago province) lalo ditoy Suyo, ta dakami nga adda iti upland ti ad-adda a mabenepisiaran,”  kinuna ni Bistoyong bayat ti eksklusibo nga interbio  kenkuana ti DZTP Radio Tirad Pass ken Tawid News Magasin itay nabiit.

Madama a maad-adal iti sangguniang panlalawigan ti resolusion nga indatag ni Bistoyong a mangsuporta iti pannakaipasdek iti probinsia dagiti Bago manipud kadagiti upland municipalities iti maikadua a distrito.

Ngem kinuna da Bokal Robert Tudayan ken Bokala Rosario Gironella, agpada a nagtaud iti upland municipalities, a masapul a maadal pay ti resolusion ken santo mataming kalpasan ti pannakakonsulta amin dagiti agtuturay iti upland municipalities.

Iti met interbiona iti radio, kinuna ni Bise Gobernador Jeremias Singson a kaykayatna  a saan a sumina dagiti upland municipalities iti probinsia  tapno agbalinda a maysa a probinsia no di ket agbalinda a maikatlo a distrito ti probinsia.

Adda 14 nga upland municipalities iti maikadua a distrito a pakairamanan ti Cervantes, San Emilio, Quirino, Gregorio del Pilar, Lidlidda, Suyo, Sugpon, Sigay, Alilem, Burgos, Banayoyo, Salcedo, Nagbukel ken Galimuyod.

Inlawlawag ni Bistoyong a saan a gapu ta mabaybay-anda iti proyekto ken programa iti probinsia ken distrito ngem mabalin a napimpintas ti serbisio a maipaayda iti mapanawanda a lugar ken iti papananda met a probinsia ta basbassiten ti makita a problema no maaddaanda iti bukod a probinsia.

“Kaasi ni Apo Dios, saankami a mabaybay-an kadagiti proyekto nga aggapu iti distrito ken probinsia, lalo ken ni Congressman Eric Singson,” kinuna ni Bistoyong  ngem innayonna nga “iti panagkunak, nasaysayaat siguro no mailasinkami…”

Idi nadamag no adda insayangkatda a konsultasion, kinuna ti mayor nga addan inrusatda a signature campaign a nakakonsultaan dagiti kailianda kadagiti upland municipalities.

Iti napalabas, adda tignay a mangisina kadagiti upland municipalities nga agbalin a maikatlo a distrito iti IlocosSur ngem awan ti dimmur-asanna.

Kangrunaan nga areng-eng dagiti mangipagpagna iti gannuat ti nabuntog nga asenso dagiti upland municipalities no maikumpara kadagiti il-ili iti patad.#