Footer

Salaysay: Kannawidan Ylocos Festival: pangitandudo iti kultura, produkto… (Maudi a Paset)

NAIPAKITA met ti agduduma a talento dagiti umili idi Pebrero 1 a pannakaisayangkat ti Talugading ni Ilokano (Talent Competition) Adda nagsala iti modern ken tribal,  nagdueto, nag-exhibition iti drums, lyre, nag-comedy show, nag-juggling iti bote, nagdaniw ken nagtokar iti piano ken trumpeta.

Inyalat dagiti sumasala a Satisfaction Guaranteed ti umuna a puesto. Kas premioda, immawatda iti tropeo ken P20,000. Maikadua ni  juggling expert FJ “Roma” Baclig a nangyawid iti P15,000 ken maikatlo ti San Emilio Cultural Dancers a naikkan iti premio a P10,000.

Iti kaaldawan ti selebrasion, Pebrero 2, awan manen ti itiitan iti sango ti kapitolio gapu ta iti daytoy nga aldaw ti panagrampa ken panagsungbat iti saludsod dagiti  agkakapintas ken agkakalaing a Saniata ti Ilocos Sur. Napigsa a sipsipat ken riaw dagiti lallaki idi rummuar dagiti Saniata a nakaswimsuit. Nagbalin a host ti pageant ni Paolo Bediones. Kamkameng ti hurado da Roberto de Venecia, National Designer Rene Salud ken former beauty Queens Carlene Aguilar, Rica Taylor ken Abby Cruz.

Inyalat ni Patricia Francisco  ti korona a Saniata ti Ilocos Sur 2008 ken  P50,000 kas gunggonana. Tagudin ti puon ni Patricia ngem agnaeden iti Malasiqui, Pangasinan.  Ibagiannanto ti Ilocos Sur iti sumaruno a Binibining Pilipinas Pageant. Saniata ti Ilocos Sur Tourism ni Robyn Michelle Tuttle  ti  Tagudin met laeng ket ibaginanto ti probinsia iti Mutya ng Pilipinas Pageant. Naibalangat met ken ni Diana Viray ti Cabugao  ti Saniata ti Ilocos Sur Environment ket ibagiananto ti Ilocos Sur iti sumaruno a Miss Philippines Earth. First runner-up ni Roselle Anne Torres ken second runner-up ni Donatella de Vera, agpada a taga Vigan City.

Napili a kas Miss Congeniality ni Angela Luz Abualatta, taga-Capangpangan, Vigan ; Miss Photogenic ni Maricel Manzano, taga-Candon; Media’s Choice ni Patricia Francisco; Best in Swimsuit ni Cherry Ann Kubota ti Sta. Maria; Miss Talent ni Robyn Michelle Tuttle; Ilocano’s Choice ni Roselle Anne Torres; ken Best in Formal Attire ni Diana Viray.

Iti maudi a rabii, Pebrero 3, pinadayawan ti probinsia dagiti Ilocos Surians a nagballigi iti agduduma a national ken international competitions idi napalabas a tawen babaen ti Pammadayaw ken Panangbigbig. Naiyawat ti Father Jose Burgos Achievement Award kada Madeleen Tacadena (Cabugao) ken Freddie Lazaro (Burgos)  iti benneg ti journalism; Joseph Velasco (Bantay), Jonel Gallego (Candon City), Sarah Jane Pascua (Candon City), Rose Jean Lodivico (Santiago), Jojit Castillo (Vigan City), Rio de la Cruz (Santiago), Randy Pacunan (Vigan City), Janus Mangibat (Candon City), Generose Razo (Candon City) ken Regie Mcarl John Talavera (Sto. Domingo) iti Sports; Jacov Ivan Dumbrique (Vigan City) iti International Math Conpetition; Gilson Matute (San Juan) iti Science Fair ken Joselle Singson (Sinait)  iti Campus Journalism.

Inawat met ni Romeo Lanuza ti Tagudin ti Fr. Jose Burgos  Special Award idinto a Fr. Jose Burgos Service Award ti naiyawat kadagiti tallo a naggobernador   iti  Ilocos Sur  a da Gov. Godofredo Reyes (Sta. Maria), Gov. Carmeling Crisologo (Vigan City) ken Gov. Luis “Chavit” Singson (Vigan City).

Ti Fr. Jose Burgos Award ti kangatuan a pammadayaw a mabalin nga ipaay ti probinsia  maysa nga Ilocos Surian.

Naiyawat pay iti  pilantropo a CEO ti MFLM Madrigal Foundation Ma. Ferl Lalaine Madrigal ti kopia ti resolusion a nangideklara kenkuana kas “Adopted Daughter” ti  Ilocos Sur. Pammigbig ken pagyaman daytoy ti lokal a gobierno ti probinsia iti awan sarday a pannakitintinnulongna kadagiti medical missions ken  iti outreach program a Kakailian nga Agnaed iti Barbarangay Sangsangkamaysa nga Agrang-ayTayo (Project KABSAT) babaen ti panangitedna kadagiti agduduma nga agas ken bitamina. Timmulong pay ni Madrigal iti  pannakaipatungpal ti 120 days a supplemental feeding program ti  probinsia para iti 500 a malnourish children idi Disiembre itay napan a tawen.

Ditoy pay a naipakaammo a Best Dressed Booth iti trade Fair ti  Caoayan, ken Top Seller ti Tagudin.

Nupay damo pay laeng a naangay ti Kannawidan Ylocos Festival, dakkelen ti nagbalin nga impact daytoy  kinuna ni Gob. DV Savellano. Gapu iti positibo a  panangawat ken napintas a feedback dagiti nagbuya ken nakipaset, impanamnamana iti sangkaprobinsiaan ti  dakdakkel a parambak iti sumaruno  a tawen ta saanto laengen a provincewide daytoy no di makipartisipar pay  dagiti probinsia iti Rehion Uno ken uray pay ti Abra.#