Footer

Lallaki nga agtuturay, pinadisi dagiti babbai iti puestoda

VIGAN CITY – Itay Marso 3, ‘napadisi’ dagiti lallaki nga agtuturay ken pangulo dagiti nadumaduma nga opisina ket inmatonan dagiti babbai ti rienda ti gobierno iti maysa nga aldaw.

Agsipud ta lalaki ti agdama a bise mayor, sinublat ni Konsehala Lourdes Baquiran ti puestona ket isu ti nagbalin a presiding officer iti naisayangkat a session iti daytoy nga aldaw.

Uray dagiti lallaki a konsehal, impabus-oyda kadagiti babbai a nagbalin a counterpartda iti sangguniang panlungsod nga isuda ti nakipaggamulo iti panagpanday iti linteg.

Nagpabus-oy met dagiti lallaki a pangulo dagiti nadumaduma a pagopisinaan iti city government kadagiti babbai a nagtugaw iti puestoda.

Paset daytoy iti panangrambak ti city government babaen ti panangidaulo ni Mayor Eva Marie S. Medina ken dagiti gunglo dagiti babbai ditoy siudad iti International Women’s Month a maang-angay iti bulan ti Marso.

Comments are closed.