Footer

SALAYSAY: Madrigal Foundation: Dakkel a Katulongan ti Ilocos Sur kadagiti Proyektona

Daytoy naudi ket isu ti “Kakailian nga Agnaed iti Barangay
Sangsangkamaysa nga Agrang-ayTayo” wenno KABSAT Outreach Program nga
umasping iti KALAHI ti gobierno nasional. Mismo a dagiti opisina ti
kapitolio ken dagiti agduduma a national agencies ti dumanon kadagiti
nasulinek a lugar tapno idanonda dagiti dawat dagiti agindeg kasta
metten nga idanonda dagiti serbisio nga iti laeng kabisera a
maprosproseso. Kinarkarton nga agduduma ti klasena nga agas ken
bitamina ti itugot ti grupo ni Madam Lalaine ken isu a mismo ti
personal a makipagwaras iti agas kadagiti agindeg.

Nagidonar payen ni Madam Lalaine iti agduduma a post production equipments ken media vehicle para iti National Broadcasting Network (NBN Vigan), ti estasion ti telebision a patpatarayen ti gobierno probinsial kas tulongna iti pannakapasayaat ti information dissemination ditoy.

Idi Disiembre 17 itay napan a tawen, nakitinnulong manen ti Madrigal Foundation iti 120 nga aldaw a Food Assistance Program ti Ilocos Sur a “Salun-at dagiti Ubbing Pasayaaten Para iti Narang-ay a Masakbayan”. Aganay 500 a malnourished nga ubbing manipud kadagiti ili ti Cervantes, San Vicente, San Ildefonso, Tagudin, Salcedo, Banayoyo, Sta. Catalina, Sugpon, Alilem, Quirino, Cabugao, Santa, Bantay, Sta. Cruz ken Sto. Domingo ti benepisario iti daytoy a programa.

Kas panangbigbig ken panagyaman ti gobierno probinsial, napagbalin kas “adopted daughter” ti Ilocos Sur ni Madam Lalaine babaen ti maysa a resolusion nga impasa ti hunta probinsial nga idauluan ni Bise Gob. Jeremias “Jerry” Singson. Naiyawat ti naikuadro a kopia daytoy idi Pebrero 3 bayat ti pannakaselebrar ti kaunaan a Kannawidan Ylocos Festival a pannakarambak ti maika-190 a tawen ti Ilocos Sur kas agwaywayas a probinsia.

Ngem iti baet ti dandanin saan a mabilang ken agarup saanen a magatadan a naipaay ti pilantropo para iti Ilocos Sur, nagtalinaed ti kinapakumbabana. No pagdamagam no apay a kastoy ti kaespesial dagiti Ilocos Surians iti pusona, ibagana nga isubsublina laeng ti ayat nga ipapaay dagiti taga-Ilocos Sur iti panaggustoda iti serbisio ken produkto ti Madrigal Group of Companies. 

Kas kuna ni Madam Lalaine, agingga nga awaten ti Ilocos Sur ti ididiayana a tulong saanto nga agsardeng ti grupona a mangsaranay kadagiti umili.

Maymaysa met ti iyeb-ebkas ita dagiti taga Ilocos Sur iti angelda: “Dios unay ti agngina Madam Lalaine.”#