Footer

BUKANEGAN: MAESTRA A MAPAN MANGGED DIAY JAPAN (Maudi a Paset)

BABAI

Saan a rumbeng a maibaba ti dayawmi a babbai

Saan a maiparbeng ti Japayuki kadakami

Lalo dagiti propesional a kas kaniak a babbai

Ngarud, ilabanmi ti kalinteganmi a babbai

Ti panag-Japan ni mistra ublagenmi

LALAKI

Saanen nga uso ita ti Maria Clara

Ti nasken ket mapnek ti bituka

BABAI

Ti bituka laeng ti ammom

Ngem ti dayaw dimo man la masalapon

LALAKI

Apay, mapakannaka kadi dayta a daydayaw?

BABAI

Apay, malapdam kadi dagiti dila a nauyaw?

LALAKI

Basta, ag-Japan ni maestra

Palubosan no isu ti kayatna

Ti bukodda a decision di koma  makibiang

BABAI

Karbengan ti nagannak ti  mangbagbaga

Iti pagpeggadan ti anak a naidumduma!

Isu a sika, kasalisalko, sumukokan

Isardengmon ti rasonmo a kabirkogan!

LALAKI

Saan! Ipettengko latta ti kapanunotak

Ta isu dayta ti pagrang-ayak!

BABAI

Saan a pagrang-ayan, pakaisagmakan!

LALAKI

Pagrang-ayan! Saan a  pakaisagmakan!

BABAI

Dimon ipapilit! Saankan a nakulit.

LALAKI

Ket no sika iti nakulit!

BABAI

Ay, apo aya, siakon ti mabuisit!

LALAKI

Ahuu, basta Japan, Japan sagot sa kahirapan!

MANGITURTURONG

Hep, hep, hep, agsardengkayon a dua, kakabsatko

Ti panagbara ti piditpidit ken pispisyo

Ket saan a maiparbeng nga aramid ti natakneng a tattao

Denggenyo ketdi ti sonata ni Ilokano

Tapno mapalamiisan ti tuktokyo!

Ala man ngarud patgek unay a maestro

Inka man patokaren daytay para tapat a kaay-ayo

Wenno daytay balse ta sumala man datayo

Pagur-urayan iti keddeng no asino iti nangabak kadakuadan

Kadagiti dua a nagsalisal iti naidumduma a bukanegan

Ala ngarud, maestro, agpatokarka man!

MUSIC: Ilocano song

(THEN)

MANGITURTURONG

Ti panagamiris no asino iti nangabak kadakuada

Ket nakarigrigat nga aramiden a banag dayta

Ta isuda a dua ket nalaing nga agkalintegan

Makapnek iti imbaskagda a kapanunotan.

Dayaw ken kultura ti nagbatayan ti prinsesa ti bukanegan

Kinarang-ay ken ambision iti prinsipe inna met nagbatayan

No asino kadakuada a dua iti korona innak ita putongan

Saanko a maaramid dayta ta diak ida makedngan.

Tapno awan ti masasair, ti mangeddeng ket dakayon

No asino ti mangayat ken (nagan ti babai) agpalakpakkayon

(paliiwen ti tallaong)

No asino iti mangayat ken (nagan ti lalaki) agpalakpakkayon

(paliiwen ti tallaong)

Ti parikut ket nasungbatanen

No asino ti nalalaing kadakuada nasolbaren

Gapu iti ayatyo a kalugaranen

Ti nangabak ket ni___________(no asino ti ad-adu iti nagpalakpak, no saan a makadesidir, ideklaran a tabla ti labanan).#

 

Comments are closed.