Footer

Nominasion iti hall of fame, lifetime achievement awards para mannurat nga Ilokano, aggawaten ti TMI

Kayat nga ipakaammo ti Timpuyog dagiti Mannurat nga Ilokano
(TMI)-Global, babaen ken ni TMI Presidente T. Gabriel Tugade, a
mabalinen ti mangisumite iti nominasion para kadagiti sumaganad a
pammadayaw:

1.  Ilocano Writers Lifetime Achievement Award

2. Posthumous Award for Ilocano Writers

3. Ilocano Writers Hall of Fame


Dagiti Pagannurotan:


1.  Mabalin ti uray asino man a mannurat nga Ilokano (agraman dagiti kameng ti komite) ti manginominar iti para kadagiti pammadayaw babaen ti surat a pakailanadan dagiti rason para iti nominasion.  Maipatulod dagiti dokumento babaen ti e-mail address a nailanad iti baba wenno maibuson iti sabali pay a mailing address a maipablaakto tapno mapasingkedan ti nominasion ken/wenno kualipikasion ti nominee.

2.  Mabalin nga inominar ti mannurat nga adda darana nga Ilokano nga agsursurat iti uray ania man a lengguahe no la ketdi mainaig dagitoy a sinurat iti literatura.  Kasta met a mabalin nga inominar ti mannurat a saan nga Ilokano ngem agsursurat iti Ilokano.  Nasken a mailukon iti nominasion dagiti paulo dagiti sinurat ti maseknan ken ti nakaipablaakan dagitoy, kasta met dagiti naitulongna iti pannakatubay dagiti agdadamo a mannurat nga Ilokano ken dagiti dadduma a naaramidan daytoy a nagparangpaya wenno nakatulong iti idudur-as ti Literatura Ilokana.

3.  Nasken nga agtawen iti 50 wenno nasursurok pay ti nominee.

4.  Saan a mapagduaduaan ti nominee ket addaan prinsipio ken moralidad/etika a nangidaldalan.

5.  Pinal ti pangngeddeng ti komite.  Maipablaakto ti nagan dagiti mapadayawan iti Bannawag, iti Tawid News Magasin ken dadduma pay a magasin ken mai-post iti internet.  Kasta met a mapakaammuan dagiti mapadayawan babaen ti surat wenno e-mail.

6.  Maikkan iti sertipiko a pammadayaw dagiti mapili iti Nasional a Panagtitimpuyog  ti TMIF-Global inton Oktubre 2008.

7. Ti Komite ti mangngeddeng no asinonto kadagiti mainominar a mannurat ti mairaman iti Ilocano Writers Hall of Fame.

8.  Ipatulod ti nominasion kadagiti sumaganad nga e-mail address:

[email protected]

[email protected]

[email protected]

[email protected] (Aida Tiama)

Comments are closed.