Footer

ASAD, nailungalong iti Abra

BANGUED, Abra – Kinuna ti dadaulo ti National Irrigation Administration a maituon iti irigasion ti proyekto ti ahensia nga idauluanna tapno makalung-aw ti probinsia kas maysa a kakurapayan iti Cordillera.

Kinuna ni NFA Administrator Marcelino Tugawen, Jr. nga adda pammilin ni Pres. Gloria Macapagal Arroyo a maikkan dagiti irigasion iti Abra iti prioridad ket iti pannakaiparang ti proposed a proyekto iti Presidente, adu dagiti saludsodna no mano ti maserbian a mannalon, kasano kalawa ti maikkan iti irigasion ken dadduma pay.

Itay nabiit, iti panagbisita ni Pres. Gloria Macapagal Arroyo ditoy, imbatadna a ti agrikultura ti maysa kadagiti  prioridad a programa ti administrasionna kadagiti sumaruno a tawen.

Inrusat pay ti Presidente ti Abra Sustainable Agriculture Development (Asad) program a mangitag-ay kadagiti marigrigat a lugar ditoy tapno agbalinda a self-sufficient nga agtaltalon a komunidad.

Rinuk-atan ti Presidente ti P100 milion para iti operasion ti programa a manamnama a mangsaklaw iti rinibu nga ektaria a kataltalonan ken mangipaay iti panggedan kadagitoy a lugar.

Kinuna ni Tugawen nga ipamusposan ti opisinana a mapaalisto ti trabaho iti nasao a proyekto a manamnama a mangbenepisio iti nasurok 1,000 a mannalon iti pannakapasayak ti nasurok 2,000 nga ektaria ti kataltalona.

Uppat a lugar ti pakaiyimplimentaran ti proyekto a pakairamanan ti ili ti Manabo, Lagayan, Pilar ken La Paz.#

Comments are closed.