Footer

BANNER NEWS: Sabali pay a pasdek iti Baguio City, nauram

BAGUIO CITY – Sabali manen a pagtagilakuan ti nauram ditoy siudad itay abril 14,  sumagmamano nga aldaw kalpasan ti pannakauram ti dry goods section.

Nauram ti maikadua a kadsaaran ti Andoks Restaurant a masarakan iti Session Road a mapapati a nagtaud manen iti faulty wiring.

Nupay kasta, bassit laeng ti nadadael gapu ta nadaras a nadepdep ti uram.

Daytoy ti maikapat nga uram a napasamak ditoy siudad iti las-ud ti tallo a bulan iti daytoy a tawen.

Kabayatanna, linagidaw ni Victor Calimlim, tesorero ti Baguio Market-Plaza Cooperative Multipurpose (Bamapcom), ti saan a pannakainspeksion dagiti koneksion ti koriente kadagiti pagtagilakuan iti tiendaan publiko ditoy a mapapati a puon ti pannakauram ti dry goods section itay Abril 11.

Segun ken Calimlim, nagbaybay-a ti siudad iti saan a pannakinspeksion kadagiti pagtagilakuan iti tiendaan publiko iti uneg ti 18 a tawen tapno maamiris koma ti kinatalged dagiti koneksion ti kuriente.

Mapattapatta a P3 milion ti dimmapo a tagilako ken sanikua gapu iti pannakauram ti dry goods section.

Agdagup iti 56 nga stall ti dimmapo iti uram a nangrugi iti  alas 4:20 iti parbangon. Nakontrol dagiti bombero ti uram kalpasan ti maysa nga oras.

Dagiti agsasallupang ken agtitinnali a barut ti kuriente ti maipagarup a  nagtaudan ti uram, segun iti report dagiti security guard ti tiendaan.

Kinuna ti maysa a guardia a nakangngegda nga  immuna iti sanetset sakbay ti apuy.

Idi Abril 2,  agdagup iti P45 milion ti balor dagiti tagilako ken sanikua ti naireport a dimmapo iti pannakauram ti Tiong San Harrison Supermarket.  Nagpaut ti uram iti siam nga oras.

Nangrugi ti uram iti 6th floor ti walo-kadsaaran a pagtagilakuan. Faulty electrical wiring ti maitudtudo a gapu ti uram.

Agpateg met iti P70M ti balor ti sanikua a dimmapo idi nauram ti maysa a pasdek ti Unibersidad ti Baguio idi Pebrero 11 iti daytoy met la a tawen. Barut ti kuriente ti maipagarup a gapu iti nasao nga uram.#