Footer

SALAYSAY: Kasano kapudno dagiti politiko iti partidoda? (Maudi iti tallo a paset)

Idi agbalaw ni de Venecia, nakaummongen dagiti kaaliado ni Pres. Arroyo iti umdas a bilang a mangpatalsik kenkuana iti puestona ket impatugawda ni Dip. Prospero Nograles a kas House Speaker.

Saan pay a napnek dagiti nangpadisi kenkuana, inikkatda pay a presidente ti Lakas-NUCD iti baet nga isu ti maysa kadagiti pundador iti daytoy a partido.

Inkalintegan dagiti nangkugtar kenkuana a kasapulan a maikkat a Presidente ti Lakas-NUCD ni de Venecia gapu kadagiti waragawagna maikontra iti liderato ni Pres. Arroyo.

Idi damo, natangken dagiti waragawag ni de Venecia a saanto nga agikkat a dadaulo ti Lakas-NUCD ngem iti panaglabas dagiti aldaw, nagbalin ti timekna nga areng-eng laengen ket kas ninamnama, inkulpana ti ulona kalpasan ti panangited dagiti nangpadisi kenkuana ti pakunsuelo a titulo a “presidente emeritus” ti partidona.

Ita, agngangabit nga alun-onen ti Kampi ti Lakas-NUCD tapno nabilbileg pay ti partido ti Presidente para iti masungad a presidential election inton 2010 nupay sumagmamano a dadaulo ti Lakas-NUCD ti nagkuna a saan a mapasamak nga agtipon a maymaysa a partido ti Kampi ken Lakas-NUCD agingga a saan pay a marisut ti problema ti politika kadagiti il-ili, siudad ken probinsia gapu iti kaadda dagiti nagsinnalip a kandidato iti baet nga agpadada a nagtaray iti babaen ti administrasion.

Ngem iti pannakapaksiat ni de Venecia iti puestona, dakkel ti posibilidadna nga adunto a kameng ti Lakas-NUCD ti agikkat ditoy ket bumallasiwda iti Kampi aglalo dagiti nakaturongen ti matada iti eleksion inton 2010.

Ket masaludsod: kasano kapudno dagiti politiko iti partidoda?

Kadagiti tradisional a politiko, saan a ti interes ti partidoda ti kitkitaenda no di ti interesda agsipud ta saan a malibak, dakkel a katulonganda ti nalanaan a makinaria ti agdama a turay para iti basingkawel ti politika inton 2010.

Ania ti kayat a sawen dagitoy a leksion iti napalabas? Nalawag a saan a pagtalgedan dagiti dadaulo ti partido ti loyalidad dagiti lider ken kamkamengna. Iti politika ditoy pagilian, ti partido ti Presidente ti dominante a partido ket agwerret amin a bileg ken turay iti sentrona nga umammingawan dagiti babassit a partido ken umadawanda kadagiti “pudot” ken “grasia” tapno saanda a maidaleb ken maiwalin iti igid ti dalan. Ditoy pagilian, arig kulibangbang dagiti politiko nga agakar-akar iti partido gapu iti bukodda nga interes ken pagimbagan ket pagduaduaan ngarud ti kinapudnoda iti partido. Saanda a bumdeng a lumaksid ken tumallikud iti partidoda no masiripda a “naberberde” a pagaraban ti sabali a partido, nangruna no partido ti administrasion agsipud ta ditoy ti pakasakduanda iti “ubbog” a pangidur-asda ken pangitag-ayda iti kinapolitikoda.

Iti yaasideg ti eleksion inton 2010, saan a masaaw a mairusat dagiti alliances dagiti partido nga agsentro iti partido ti Presidente. Ngem no taliawen ti historia ti politika ditoy pagilian, dakkel ti posibilidad a marpuogto met daytoy aglalo no bumabanton ni Pres. Arroyo iti puestona inton 2010 ken sumublat nga agturay ti oposision.

No alaen a pagibatayan ti resulta ti eleksion idi 2007, nababa ti kredibilidad ti administrasion gapu kadagiti alegasion ti panagsuitik ken anomalia a mapapati a nakaisawsawan dagiti opisial ti turay a dakkel a nakaitibkolan dagiti kandidatona para senador.

Masirib itan dagiti politiko. Adu la ketdi dagiti agsipsiput ken di pay agkutkuti a tumipon iti Kampi agsipud ta no maibatay iti eleksion idi 2007, dakkel a pagilasinan   a manabtuog ti partido ti agdama nga administrasion iti eleksion inton 201 0 no saan nga agtignay itan dagiti dadaulo daytoy a mangpasayaat iti imahena.#

Comments are closed.