Footer

SALAYSAY: Nananam ti Daniw-Ubbog

Ubbog. Danum  manipud iti barukong ti ina a daga. Mangited iti bang-ar iti barukong. Lalo kadagiti napaksuyan  ken makaturturog a rikna, kultura ken kannawidan.

Dati, awan ti ubbog. Ngem kalpasan ti lima a tawen manipud pannakaipasngayna, nanamen ti danum nga agpussuak  kenkuana. 

Ti ubbog ket grupo dagiti estudiante iti UP-Baguio a mangitantandudo iti rehionalismo wenno kadagiti daniw-Amianan. Naipasngay ti grupo idi 2003 babaen ti maysa  a poetry reading iti UP Baguio.

Nababagas ti mensahe dagiti daniw-Amianan: Iluko, Nabaloi, Pangalatok, Kankanaey, Bolinawon ken Zambal. Saan a makieme wenno overacting wenno managinkukuna dagitoy nga agtutubo a mannaniw. Impeksada ti riknada babaen ti bukodda a dila.

Siempre, saan a paatiw dagiti Saluyot. Rimmimbawda ketdi. Makapabang-ar iti rikna nga adu pay laeng dagiti agtutubo nga agduyos ken mangilala iti dandaniw.

Naangay ti maysa a poetry reading idi Pebrero 20 itoy a tawen kas paset ti panangselebrar iti National Arts Month babaen ti panangesponsor ti National Commission on Culture and the Arts (NCCA) , UP Baguio Committee on Culture and the Arts ken ti Baguio Writers Guild ket naitandudo ti laing ni Ilokano iti panagdaniw. Diak ninamnama ti laing dagiti estudiante nga agdaniw iti saluyot, lalona kada Juneley Lazaga (i-Tagudin, IS) ken dagiti kakaduana.

Iti pammaliiw ni Djuna Alcantara, publisher ti magasin nga AWARE, a dimmar-ay met a nagpaliiw kadayta a pasken, dina ninamnama nga agdandaniw iti Iluko dagitoy nga estudiante iti UP, a nalaingda  nga agdaniw iti bukodda a dila.

Iti mensahe ni Mylene Urriza, representante ti NCCA a nangsaksi iti pasken, kinunana a naragsakan a makangngeg kadagiti daniw-Amianan ket nasken ti pannakaipromot ken panangibayog kadagiti kannawidan ken kultura a pakairamananen kadagiti daniw-Amianan. Insingasingna ti pannakailibro dagitoy a gapuanan dagiti agtutubo.

Kanayon metten ti pasken  ti pannakaiyalnag ti libro a “Womb of Water, Breast of Earth”  a nangabak iti 2003 NCCA Writer’s Prize para iti epiko iti selebrasion iti tinawen a Panagbenga Festival ti siudad.

 Karaman dagiti estudiante ken toy nagsurat a nagdaniw da Elizabeth Lolarga, Francis Macansantos, Mercie Dulawan, Elizabeth Caliwanagan ken Priscilla Macansantos, agpapada a mangisursuro iti UP Baguio.#

Comments are closed.