Footer

SARITA: TI BOSS (Maikadua a paset)

“Apay a nagadukayo manen a napan nag-field? Dua la ti mapan, kunak la ngaruden. Ita nagadu toy pa-imburseyo? Apay, di la sinuktan ta ininterbioyon ta pinagpleteyo ket makita met iti TV ta rupana?” impasabat manen ni Memong iti news team iti naminsan a panagdakiwasda nga agala iti damdamag.

“Napanak, sir, ta uray isu la a maisurat iti Boses ti Norte a pagpapaayantayo kas news syndicate. Para met la iti estasion ti ar-aramidek. Bilin met ni manager nga ituloyko latta ti agsurat,” naalumanay a sungbat ni Milo .

“Dimi met a mabalin a pasukatan ti pletemi kadagiti papananmi a tattao ta rebbengen met ti estasion ti mangigasto iti news team,” kunana met ni Poldo.

“Nakagasgastadorkayo! Nagadu a papare-imburseyo.”

Saanen a nakapagteppel ni Milo. Kinautna iti bolsana ti selponna. “Tapno dimo kuna a salawasawak, basaem toy text ni manager. Sakbay a rimmuarkami, nagpakadaak nga immuna kas rebbengna ta isu ti boss ditoy opisina. Maysa pay, kanayonmo met a pasukatan ta gasolina ti luganmo. Adda kenkan, Mang Memong, no ni manager a mismon ti pagpare-imbursesanmin.”

“Ay, saanen. Modtoyen ta nagkuntaram ta itedkon,” siniggawatnan ti papel ken ni Milo ket tumanabutob a napan iti kaha tapno sukatanna ti plete dagiti nagfield.

Nagiinnisem met dagiti tinallikudan ni Memong ta nakitada ti ipupuraw ti nalitem a bibigna itay ipakitada ti text ti manager.

“Agbalayto la ngata ti dara iti utekna,” inyarasaas ni Mikiong. Dagus met nga impakuros dagiti kakaduana ti tammudoda iti bibigda ta adda iti asidegda ni inhiniero Ogie Diaz. Kasla ngamin showbiz tsikadora iti telebision daytoy no maipanggep kadagiti maipalapayag kenkuana a nangsuspetsaan pay ketdi ti nagresign idi dianitor nga adda sabali a “widawidna”.

Bigat ti Biernes. Maudi manen nga aldaw ti trabaho ngem saan latta a pinalabas daytoy ti “maikadua” a manager. Apagserrek pay laeng dagiti dua a cameraman, inaritaktakna idan iti sermon. Kasla opisial ti Phil. Army ti kumpas dagiti purked a ramayna idinto a kasla biktima ti hazing ti langa dagiti cameraman.

“Asino ti nangala kadaytoy?” impakitana ti footage.

“Siak, sir,” kinuna ni Ferry.

“Talaga a saanmo nga ammo ti napintas nga anggulo? Kasanoka a nagbalin a cameraman?”

“Dua a camera idi ti nausar, bosing Memong, isu nga agsabalida iti anggulo. Sa ni manager ti nangipuesto iti dayta nga anggulo,” insampitaw ni Poldo.

“Ket isuroyo a. Apay, gapu ta manager, diyo maibaga ti kamalina? Ti man la ngata butbutengyon.”

Nagkinnita dagiti dua sada nagkinnidday iti nalimed.

“Maikadua, apay a nakiray dagitoy a rinetratoyo?”

“Ket no maikasangapulon san a patong dagita, bosing…”

“Diyo la imbagan ta gimmatangtayo iti baro. Ni pay met nga’d gobernador ti ininterbioyo.”

“Ay sus, bosing, am-amang pay nga imbagami a kasapulan ti baro a DV tapes. Naaprobaran metten a nabayag ti pondotayo para kadagiti kasapulan ti news team ngem awan pay met uray nikel nga inlanadyo,” kinuna manen ni Ferry.

Kasla nasullatan iti bukel ti santol ti karabukob ti butiog nga assistant manager iti kinuna ni Ferry. Kimmaro ti misugsog ti siguden a nasidunget a panagruprupana. Masiluan itan ti sungona.

“Basta kayatko a napintas dagiti kuhayo, nalawag?” sinipatna ti nagbukel a lamisaan.

Imbes a sumungbat dagiti dua, timmalikuddan a nangpidut kadagiti kamerada. Binay-andan ti panagngiwatngiwat ni Memong. Kunkunada pay ketdi iti panunotda a no maatake kadagita a kanito, dida la ketdi arayaten.

Pati dagiti estudiante a mapan ag-OJT iti estasion, saan a palabsen ni Memong. Talaga a kasla kurang ti aldawna no di agunget. Kas man la magangganasan iti uray la nga no makakita iti kumkumpes iti sanguananna. Phobopilia, kunadan sa iti kasdiay a sakit.

“Good morning, sir!” inkablaaw ti OJT.

“Itaka laeng? Ania ti orasen?” Ngimmato a dagus a 180 over 100 ti presion ti darana apaman a nakitana ti OJT.

“10:30 sir.”

“Ket?”

“Adda ngamin praktismi itay iti stage play, sir, isu a naladawak.”

“Ania ti kayatmo a sawen piningpiningem ti orasmo ditoy estasion? Diak ikonsidera nga orasmo daytoy. Immayka pay laeng, di ka pay la naginana.”

“Mabalin met kadagiti immuna a nagtreyningak, sir. Saan met la ngamin a daytoy ti subjectko isu nga in-inutak a.”

“Ay! Basta surotem diay orasmo ditoy nga 8 to 12. La, agawidkan!”

Nagal-aludoy ti OJT a nagturong iti ridaw. Nagkikinnita met dagiti empleado.

Agtantanabutob pay laeng ni Memong uray nakapanawen ti estudiante. “Talaga a paspasali dagitoy nga OJT,” sinindianna ti sigariliona sa rimmuar.

“Kinkinse man ti dara ni besprenmon, Milo ” inkidag ni Mikiong iti writer a mangtepteppel iti ibebettak ti katawana.

“Tagari, pari, mangngegnaka ni Engr. Bitsin.”

“Bay-am man. Ibagam ketdi a surotenna ni Memong ta dinto agkudaap a dina oras iti kasta a kinapungtotna.”

Bigla a kimmita kadakuada ti inhiniero isu a nagulimekdan.

“Apay, pinukawmo kano met tay card reader ken memory stick sika, Milo ?” sinaludsod ti manager.

“Inkabilko met dita uyosen ti kabinet, sir. Sa nabayagen a diak inusar,” insungbat ni Milo.

“Ket no us-usarem kano a personal, kuna ni Memong. Nangina daydiay isu a nasakit ti nakemko no mapukaw.”

“Bay-am ta birokek, sir. Ngem ipasiguradok kenka a saanko a maaramid ti agusar iti alikamen ti gobierno iti bukodko a pagimbagan. No usarek man dagidiay, para met laeng iti estasion ta dagiti ladawan a maisubsubmitir kadagiti pagiwarnak, nakasurat latta ti nagan toy estasion.”

Dandanin dua nga oras nga agbirbirok ni Milo. Agkalkaling-etanen. Timmulong payen dagiti kakaduana nga agsapul ngem talaga nga awan ti card reader ken memory stick. Nabukikbokdan ti amin a suli ti opisina.

“Imposible a maawan daydiay nga awan nangala iti pagiduldulinan,” kinuna ni Boni.

         (Maituloyto)