Footer

BANNER NEWS: Paisunsuno a regional directors, binabalaw ti RDC chairman

LAOAG CITY –  Linagidaw ti chairman ti Regional Development Council ti aleng-aleng a suporta dagiti regional directors kas ipakita ti panagpapaisunoda kadagiti adda iti babaenda iti miting ti RDC.

Indagadag ni Gov. Deogracias Victor “DV” Savellano  ti personal a yaatendar dagiti regional directors kadagiti taripnong ti Regional Development Council a saan ket a paisunoda kadagiti assistant regional directorda.

“Ikkan koma dagiti appo a director iti importansia dagiti miting ti RDC a saan ket a paisunoda a kanayon kadagiti ARDs,” kinuna ni Savellano idinto nga inggunamgunamna a mairaman  ti National Tobacco Administration (NTA) iti RDC ta isuda ti maseknan iti industria ti tabako a maysa kadagiti kangrunaan a produkto ti rehion.

Nagtitipon itay Abril 14-16 iti Fort Ilocandia ditoy a siudad  dagiti local government units, national government agencies, private sector ken dadduma pay a kameng ti Regional Development Council Ilocos-Pangasinan Region tapno  planuenda dagiti addang nga iwayatda para iti panagdur-as ti rehion.

Addaan iti tema a “One Program, One Government”, karaman ti agribusiness, export development ken tourism plan kadagiti ipangruna ti RDC tapno agballigi ti bisionna nga agbalin ti Region I a kas Northern gateway ken Northern Luzon Agribusiness Growth Quadrangle (super region).

Dinawat ni Ilocos Sur League of Municipalities President Edgardo Zaragoza a mairaman koma dagiti kongresista  ti rehion iti amin a garaw ti RDC ta isuda ti maseknan iti pannakapondo dagiti proyekto ti council.

“Masapul nga iramantayo ida (kongresista) tapno maaddaantayo iti napigpigsa a lobbying power,” kinuna ni Zaragoza.

Dinawat met ni Laoag City Mayor Michael Farinas a maikkat koman ti innimon iti kada siudad ken probinsia, kasta metten ti tinnulad iti proyekto.

“Agtitinnulongtayo koma tapno maiyimplimentar dagiti proyekto satayo agkikinnomplimentar, ” indawat ti mayor.

Kabayatanna, dinayaw ni Hudson Wong, Second Secretary on Economics and Commercial Councellor’s Office ti People’s Republic of China, ti Strategic Investment Program nga impresentar ti RDC.

Kinuna ni Wong a mabalin daytoy a solido a pundasion  ti RDC para iti pannakikooperar ti China iti Region I a kaasitgan iti pagilianna.

“Iti masanguanan, awisenmi dagiti regional directors tapno umayda agseminar sadiay China.Tulongankayo pay a mangipromot ti Region I iti pagilianmi,” impasingked pay ni Wong. (Mancielito S. Tacadena/NBN Vigan)