Footer

Business district maipasdek iti Hundred Islands National Park

ALAMINOS, Pangasinan – Naited iti mayor ditoy ti autoridad para iti pannakakontrol, superbision, regulasion ken pannakaimaton amin nga aktibidad iti las-ud ti Hundred Islands kasta met iti Lucap Wharf ken iti igid ti karayan ditoy.

Kinuna ni Mayor Hernani Braganza a babaen ti memorandum of agreement a pinirmaan ti Philippine Reclamation Authority (PRA) nga imbagian ni General Manager Andrea Domingo ken ti Alaminos City nga imbagianna, maaddaan ti siudad iti naan-anay nga autoridad a mangaramid iti master plan para iti pannakaipasdek iti maysa a business district iti saklaw ti Hundred Islands National Park (HINP).

Inlasin ti gobierno ti siudad ditoy ti 34 ektaria a reclamation area iti Lucap Wharf kas kabarbaro a residential ken business zone a manamnama nga agbalin a business district iti sakup ti Hundred Islands National Park.

Kabayatanna, kinuna ni Domingo a babaen ti nasao a MOA, masigurado ti pannakasalaknib ti aglawlaw, ken pannakapreserba iti natural resources ti Hundred Islands iti baet ti pannakaawis dagiti agnegosio a mangited iti pagbiagan ken ad-adu a panggedan para kadagiti tattao.

Kinuna ni Domingo a nainget a monitorenda ti panagtungpal ti siudad kadagiti paglintegan ti environment.

Kinuna ni Braganza a mangnamnama a makarikna iti seguridad dagiti agnaed ken agnegosio iti las-ud ti nareklamar a lugar iti pannakapirma ti MOA iti nagbaetan ti PRA ken ti gobierno ditoy.#