Footer

Ina a nanggusod iti asawana, nakasuan

STO. DOMINGO, Ilocos Sur – “Maibturak ti panangkabkabilna kaniak aglalo no mabartek, ngem diak maibturan ti panangkabilna iti anakmi.”

Daytoy ti inyebkas ni Flordeliza Pimiente, 41, tubo iti Casilagan, Sto. Tomas, La Union ngem agnaeden iti Quimmarayan ditoy nga ili bayat ti pannakiuman kenkuana ni Buddy Tambua a naipatangatang iti  programa ti DWRS a Barangay Commando Brigada itay nabiit. 

Kinuna ni Pimiente a simleng ti panagkitana ket napatayna ti asawana gapu iti panangkabil daytoy kenkuana ken ti anakda.

Naidarum iti kaso a parricide ni Pimiente gapu iti panangpalek ken pananggusodna iti barreta ni Leonardo nga asawana a puon ti nakagudasanna.

Iti panagimbestiga dagiti polis ditoy, simmangpet ti biktima iti pagtaenganda a nabartek ket binitinna ti tallo bulan nga anakda sana sinipatsipat agingga iti im-imlek ti ubing.

Idi makaturog ti biktima, nangala ti akusado iti barreta sana impalek ken inggusod iti ulo ken tengnged ti asawana agingga a natay.

Kinuna ni Pimiente a mabuteng nga aganawa dagiti kabagian ni lakayna no kabilen daytoy.

Kinunana a pinadasnan nga impulong ni lakayna kadagiti opisial ti barangay ngem naammuan ti asawana ket kinabil la ket ngarud daytoy.

“Agbabawiak man, awanen, simleng ti panagkitak, naibbusen ti pasensiak,” insangit ni Flordeliza.#

Comments are closed.