Footer

Mapukpukaw a bombay, nasarakan a bangkay

CANDON CITY – Nasarakanen a bangkay ti mapukpukaw nga Indian national iti Solano, Nueva Vizcaya.

Nasarakan ti bangkay ni Balvinder Singh, 17, agnaed iti Block 7, San Jose, Candon City a napungo dagiti imana ken adda tagbat iti tengngedna a  mapapati a nakaigapu iti pannakatayna.

Nagpukaw ni Singh idi April 16, 2008. 

Naudi a nakita a naggapu iti pagtaengan da Jaswinder Singh, iti Block 3, Candon City a nakalugan iti motorsiklona,  addaan plaka UM-8143.

Saanen a simmangpet iti pagnaedanna.

Mapapati a biktima ni Singh iti kidnap for ransom ta nakaawat ti pamiliana iti text message manipud iti di pay nabigbig a tao a dumawdawat iti P5 milion.

Segun iti pamiliana, imbaba ti mapapati a kidnapper ti ransom iti P2 milion idi dida maited ti dawdawatenda.(Danny Antalan)