Footer

Polis, maiparit a sumrek iti videoke bar: imbilin ti provl director

BANTAY, Ilocos Sur – Maysa a pammilin ti impaulog ni PNP Provincial Director Police Senior Supt. Virgilio Fabros a mangiparit kadagiti polis a sumrek iti videoke bar ken kaaspingna a pagpalpaliwaan iti sanguanan ti pannakapapatay ti maysa a kameng ti Sta. Lucia police station.

Kinuna ti provincial director a mailaksid iti pammilin dagiti polis adda iti aktual a mission ngem masapul a nakauniporme dagitoy bayat ti operasionda.

Kinuna ti pammilin  a responsable dagiti hepe ti polis iti pannakaipatungpal iti daytoy ket isuda ti agsungbat no adda mapasamak dagiti polis nga adda iti babaenda.

Impaulog ni Fabros ti pammilin kalpasan ti pannakapapatay ti maysa a pannakabagi ti linteg ti Sta. Lucia police station ken maysa a sibilian a mapapati nga insayangkat ti maysa a soldado.

Nabigbig dagiti biktima a da SPO Joffrey Palacio y Agbulos, 49, PNP member ti Santa Lucia, Ilocos Sur ken residente iti Barangay San Nicolas, San Esteban, Ilocos Sur,  ken ni Melchor Angala y Cortez, 27, residente iti Ronda, Santa Lucia, Ilocos Sur.

Iti inisial a panagpalutpot dagiti inbestigador,  naammuan a  napan nagmerienda iti agarup alas onse y media iti rabii kalpasan ti panagpatroliada dagiti polis Sta. Lucia iti Bayon’s Eatery and Videoke Bar. Madama ti panagmeriendada iti nasao a videoke bar idi pinaputokan ida ti saan a nabigbig a suspek a mapapati a maysa a soldado.

Nagudas nga insigida ni Palacio idinto a nasugatan ti maysa a kaduada. Naitaray daytoy iti  Sta. Lucia District Hospital para ti pannakaagas ti sugatna.

Agdagup iti 24 a kapsula a naggapu iti maysa nga armalite ti naala dagiti inbestigador iti crime scene.

Agtultuloy ti inbestigasion no ania ti motibo iti pammaltog. (Karaman ti report ni Danny Antalan)

 

Comments are closed.