Footer

River cruise, maplanplano iti Bantaoay river

CABUGAO, Ilocos Sur – Main-inaw ti gannuat a mamagbalin ti Bantaoay river iti San Ildefonso, Ilocos Sur a pagbangkaan kas pangawis kadagiti turista iti probinsia.

Kinuna ni Gov. Deogracias Victor “DV” Savellano a napintas a pagbalinen a pagbangkaan ti Karayan Bantaoay a mangawis kadagiti turista kas iti Loboc river cruise iti probinsia ti Bohol.

Innayon ti gobernador a makikokoordinar kadagiti municipal officials ti San Ildefonso nga idadauluan ni Mayor Christian Purisima para iti pannakaaramid dagiti bangka para iti nasao a proyekto.

Kinuna ni Savellano a dakkel ti paset ti Bantaoay river iti Basi revolt,  ken plus factor ti kinalaing ti mayor nga agluto isu a mangnamnama nga agballigi ti nasao a proyekto a kunana a pangtapat iti river cruise iti Loboc, Bohol.

Impalgak ti gobernador a mairuginton ti pannakadalus ti nasao a karayan a lumasat iti San Ildefonso agingga iti San Vicente.

Kas iti river cruise iti Loboc, mabalin dagiti turista ti mangan iti bangka bayat ti panagdaliasatda iti karayan.

Kinuna ni Savellano a mabalin nga idasar ti basi ken Bungro ice cream bayat ti pannangan dagiti turista kas panangitandudo dagitoy a produkto ti San Ildefonso.

Paset ti promosion ti turismo ti Bohol ti Loboc river cruise no sadino a malinglingay babaen ti kanta dagiti nakalugan a turista bayat ti panagdaliasat ti bangka iti karayan.

Agtunged ti river cruise iti yan dagiti tarsier nga iti laeng Bohol ti pakasarakanda ditoy pagilian.#

 

Comments are closed.