Footer

SARITA: TI BOSS (Maudi a paset)

“Wen ngarud. Agurayka, iti laengen puesto ni Memong ti ditay naukag. Uray ta naladaw manen ti lokdit, pay man ta innak kitaen,” insungbat ni Milo .

Immuna a kinita ni Milo ti nagbabaetan ti nabunton a DV tapes a di pay naedit. Pagammuan nadlawna a bangking ti monitor ti computer. Inan-anatna a binagkat.

“Siripem man, Boni,” inyayabna.

“Adda nakasigpit ditoy par,” inkaut ni Boni ti imana.

“Naay, ‘sudaytan par’. Kitaem kadi ket ni gayam Memong ti makin-aramid. Isublim dita ta irantakto man a biroken kampay idi dita inton sumangpet ni de la Hayblad.”

Awan pay lima minutos idi sumangpet ni Memong. Kas iti sigud, napanna kan manen pinatsek-ap ni ikitna.

“Ania, addan dagitay pinukawmo sika, Milo ?” impasaksakna.

“Awan pay ngem addanton.”

“Ania ti kayatmo a sawen?”

“Iyur-urayka ngarud ta dita la puestomon ti diak nakita. Medio agtingtingig ta monitor ti computermo.”

“Ket di kitaem. Kasano koma a mapan dita?”

“Boni, bagkatemman ta kitaek.”

Dinagdagus ni Boni a  binagkat ti computer.

“Ne! adda ditoy. Kasano ngata a napan ditoy?” mangigis ti isem ni Milo a nangitag-ay iti card reader. Nakasubo ditoy ti memory stick.

“Ay! adda? Awan met idi kitaek, he! he!” mapilpilit ti isem ni Memong.

“Itextko a sigud ken ni sir.”

“Saanen ibagakto kanianan,” inyatipa ni Memong.

“La, sige ngarud.” kinuna met ni Milo. Nagtarusen iti lamisaan ket inlimedna met laeng nga intext iti manager.

“Agyamanak ta addakayo amin ita ken pinatganyo ti awisko,” natanang ti boses ti manager iti dayta a sardam. Inawisna amin nga agpapaay iti estasion.

“Masdaawkami ngarud, sir. Mabayag pay met ti bertdeym. Wenno nangabakka iti hueteng?” inyangaw ni Borgy.

“Saan ngem kayatkayo a makita sakbay a pumanawak.”

“Apay, sir, papanam?”

“La, itagaymo man pay, Mang Ped, ta sakayto sungbatan,” inyawat ti manager ti baso iti lumakayen a technician a mangrugin a maulaw iti tres cepas a sangsanguenda.

“Kakadua, ammoyo met a nabayagen nga iyur-urayko ti pannakaaprobar ti petisionko nga agnaeden sadiay Amerika. Ita ta naaprobaranen, nupay nasakit ti nakemko a mangpanaw kadakayo, masapul nga agresaynakon iti trabahok,” palawag ti manager.

“Asino nga’d ti mangsukat kenka, lakay?” narabuy ti isem ni Memong. Namnamaenna ngata nga isu ti sumukat iti puesto ti manager.

“Irekomendakanto, Memong, a mangsukat kaniak. Ngem saan a garantia dayta ta ti head office ti makaammo a mangdesision,” insungbat ti manager ket nagsubli ti namisuot a rupa ni Memong.

“Didakanto malipatan, sir. Dikanto koma mangliplipat,” dinakulap ni Milo ti manedier.

“Sapay koma ta kas met la kadakayo ti kinasingpet ken kinaanus ti sumukat kadakayo,” kinuna met ni Mikiong.

“Dakkel la ket a kawami, sir, no tay namisugsog ken managbugkaw ti isukatda a manager.”

“Wen, daytay kas manager ken pagayamyo ti kitaek,” kinuna ti manedier. “Kapatangko ti head office nga umaydanto alaen ti kaririknayo sakbay a mangipuestoda iti kasukatko.”

Apaman a nag-OIC manager ni Memong, nagbalin a nasingpet ken simmayaat ti pannakilangenna. Ngem nadlaw dagiti kakaduana nga agpapa-good shot tapno maalana ti riknada ket dida supiaten ti panagbalinna a manedier. Agsursuroken ti it-itedna a plete ti news team a rummuar. Inaldaw payen nga agpamerienda. Kaslan  naamo a pusa ti timekna a maparaipusan iti “manong” wenno “ading”.

Nalpas metten ti tulag dagiti empleado. Daytoyen ti gundawayda. Saanda la ketdi a kayat nga agnanayon ti panagkonsumisionda no ni Memong ti agbalin a manager.

Makalawas kalpasanna, simmangpet ti imbaon ti main office.

“Rekomendado ng dati ninyong manager si Mr. Memorito Putingtae para pumalit sa pwesto niya. Sino si Mr. Putingtae?” impalawlaw daytoy ti panagkitana kadagiti kasangsangona.

“Ako, sir,” dagus a timmakder ni Memong.

“So ano ang masasabi ninyo, mga kasama?”

“Hayaan sana nating ang mga tao rito ang mag-decide, sir, para makuha ang saloobin nila,” kinuna ni Mikiong.

“Anong gagawin natin?”

“Isusulat namin sa papel kung sino ang gusto naming maging manager.”

“Saanen. Itayag latta ti iman,” insampitaw ni Memong. “Awan batillogna ti mangilimed pay laeng iti ibutosna.”

“Okey, nakuha ko na. Pero sino pa ba ang isa nating pagpipilian?” inamad ti naggapu iti main office.

“Si Mang Ped, sir,” insungbat ni Milo .

“Itaas ang kamay ng mga boto kay Memong.”

Dagus nga intayag tay kadikitna nga inhiniero ti imana. Ngem uray doble-doblien ti taga-main office a kitaen, talaga a maymaysa nga ima ti nakitana.

“Ang mga boto naman kay Mang Ped.”

Saan la nga inngato dagiti empleado ti imada. Indir-ida pay ti nagan ti lakay.

“Mang Ped! Mang Ped! Mang Ped!”

“Bweno, ganyan talaga ang pulitika. Pinipili ng matatalino ang alam nilang makakatulong sa bansa este opisina pala. Congratulations, Mang Ped. Isasama na kita sa Manila para maayos na natin ang papel mo,” kinuna ti taga-main office apaman a nagsardeng ti dir-i.

Panay ti lamano dagiti empleado iti imbutosda a baro a manager. Kasla met maad-adasan ti pigsa ni Memong. Umanges-anges a kasla bulonnan ti maatake. Ngem awanen ti mangikaskaso kenkuana ta makumikomen dagiti kakaduana a mangkabkablaaw ken ni Mang Ped. Di metten makakuti iti nagtugawanna tay kadikitna nga inhiniero.

             (Gibusna)