Footer

SALAYSAY: Ti Phenomenon ti Tres de Mayo iti Vigan City (Maudi iti dua a paset)

Nagdinamag daytoy a nakaskasdaaw a napasamak. Immadu dagiti tattao a simmarungkar ken Apo Lakay, saan laengen a dagiti taga-Vigan no di pay ket dagiti deboto kadagiti kabangibang nga ili ken probinsia. Gapu itoy panagkaykaysa ken panagdidinnanon, naidekra ngarud iti pannakaadda iti piesta ni Apo Lakay nga isu ti petsa tres iti tunggal Mayo.

Naisangsangayan a petsa ti tres de Mayo kadagiti mannalon ken mangngalap iti probinsia. No sumreken  ti Mayo, taraudin wenno kalkalpas ti trabaho iti tabako a birhinia. Urayen laengen ti panagmumula ti pagay ken mais. Itoy a panawen ti panaginana ni mannalon ket ipaayna ti panawenna a sumuknal ken ni Apo Lakay saan laeng nga agyaman no di pay dumawat iti bendision para manen iti sumaruno nga aramid iti talon – ti panagmula iti pagay ken mais. Kastoy man met laengen kadagiti mangngalap iti probinsia. Ipaayda daytoy nga aldaw nga inda “isusuknal” ken ni Apo Lakay.

Naidumduma kadagiti amin a relihion iti lubong ti phenomenon ti suknal ti katolisismo. Ta  sangsangkamaysa a psyche wenno consciousness ti suknal. Maysa a realidad a maymaysa ti turong ti panunot dagiti umili – ni Apo Lakay –  ken maymaysa ti turongen – ti ‘bassit a simbaan’ iti Vigan. Maysa a bileg ti suknal  a mamaggunay iti  aldaw a panagtitipkel, panagdidinnanon dagiti umili a di agaammo iti maymaysa a lugar, iti maymaysa a kapanunotan ken iti maymaysa a pammati.  Awan daytoy  kadagiti saan a katoliko.  Daytoy ti kangrunaan a pundasion ti pammati ni katoliko  iti laksid ti nagkaadu a pannubok, pannakaumsi ken panangrebba. Ita ta dumteng manen daytoy nga aldaw,  lalo pay a degdegan ti isusuknal ti pundasion ti pammati.

Malagipko  nga idi agtutubokami, umuna pay laeng a panaglako iti naluto a tabako wenno kapas wenno lasona wenno bawang, mailasinen ti gastosen a pang-Tres de Mayo. Siempre, panagaapit. Panaglalako ti apit. Abunaw ti kuarta. Saan ngarud a lagidawen ti pannakailasin ti gastosen a pang-Tres de Mayo.

Kalpasan ti isusuknal iti simbaan,  agsiapingkami iti tiendaan (daan), iti Rosevilla Trading wenno iti Francisca Marketing. Saan a kumpleto ti panagpa-Viganmi no saankami nga agbuya iti Lyric Theater wenno iti Consuelo Theatre ken panagigupmi iti sinilian a digo ti sinanglaw iti abay ti post office wenno panaghalo-halomi iti New Society Restaurant.

 Piesta ti Vigan, kunada pay iti daytoy nga aldaw. Ta mamin-adu nga agpietsa ti Vigan. Piesta ti ili (siudad). Piesta ni Apo Lakay ken dadduma pay a festival. No dumteng ti piesta, panagraragsak – parada, sarsuela, komedia ken dadduma pay a parambak.

Ngarud, naisangsangayan nga aldaw ti Tres de Mayo iti Vigan. Saan laeng a dagiti umili iti siudad no di pay ti sibubukel a probinsia ken kabangibang. Maysa a phenomenon ti suknal a mangiyeg ken mamagtipon kadagiti umili iti sangsangkamaysa a panunot ken turongen, ti panagrukbab ken ni milagroso nga Apo Lakay.#