Footer

annakakalsada a mapan tourist spot iti Del Pilar, Sigay, indagadag dagiti mayor

GREGORIO DEL PILAR, Ilocos Sur – Dua a lugar ditoy ti dakkel ti
potensialda nga agbalin a tourist destination ngem narigat ti dalan nga
agturong kadagitoy a lugar, segun kadagiti agtuturay daytoy nga ili.

Kinuna ni Mayor Gilbert Ciriaco a dakkel ti potensial ti hot spring a masarakan iti Sibol ditoy nga ili a pangawis kadagiti turista ngem narigat a danonen daytoy dagiti turista gapu iti kinarigat ti dalan.

Kinuna ni Ciriaco a maiyuna koma ti pannakapasayaat ti kalsada tapno nalaklaka a madanon ti nasao a hot spring.

Iti panangbisita ni Gov. Deogracias Victor “DV” Savellano iti Sibol hot spring itay nabiit, kinunana a dakkel a pangawis kadagiti turista dagiti natural a rock formations ditoy ken ti napudot a danumna a kuna dagiti agindeg a makaagas.

Nangiyawid ti gobernador iti danum a naggapu iti hot spring tapno ipaeksamenna iti Department of Science and Technology tapno mapaneknekan no ania ti masarakan iti danum a makaagas iti sakit ti kudil a kas  ibagbaga dagiti lumugar.

Kinuna ni Ciriaco a  maplanplano ti pannakaipasdek ti swimming pool iti aglawlaw ti hotspring a mabalin a pagdigosan, kasta mettendagiti cottages a paginanaan ken umianan dagiti maisar-ong wenno agpasiar a turista.

Kabayatanna, segun met ken ni Bise Mayor Simeon Wandas, dakkel ti potensial ti Aw-asen Falls ti ili a Sigay nga agbalin a tourist destination ngem sumagmamano pay laeng a turista ti nangpadas a mapan iti nasao a lugar gapu iti kinarigat ti dalan.

Kinuna ni Wandas a saan a makalsadaan ti bato a bakras ti bantay, ket kasapulan ti pannakatikap ti bakras tapno agbalin nga agdan para iti nadardaras nga idadanon iti nasao a lugar.

Iti agdama, agpaut iti dua nga oras ti panagdaliasat sakbay a madanon ti nasao a baresbes.

Kanaig daytoy, kiniddaw ni Mayor Erlinda Gaerlan ti tulong ti gobierno probinsial tapno ma-develop ti Aw-asen Falls a  mainayon a pangawis ti Sigay iti turista.

Maaw-awagan ti Sigay a summer capital ti Ilocos Sur gapu iti kinalamiis ti klimana.

“Malaksid ti kinangato ti Sigay, adda ordinansami a maiparit ti agpukan iti kayo a para lako isu nga agtaltalinaed a nalamiis ti klima iti ilim,i” kinuna pay ni Gaerlan. (Mancielito S. Tacadena/NBN Vigan)  

 

Comments are closed.