Footer

3 grupo, sinupiatda pannakaipasdek 2 condo iti kasalengan

BAGUIO CITY – Sumagmamano a grupo ditoy siudad ti nagtignay tapno malapdan ti plano a pannakaipatakder ti dua a condominium iti kasalengan iti lakub ti maysa a korte, pagkonbensionan, ken unibersidad ken nakaipasdekan ti maysa a shopping mall.

Nangidatag dagiti empleado ditoy siudad iti bukodda a petision a nangidagadaganda iti Government Service Insurance System (GSIS) a mangibabawi iti tanggayana iti SM Investment Corporation (SMIC) a mang-develop iti kasalengan a lote a linawlaw ti Supreme Court, Baguio Convention Center, University of the Philippines, Baguio ken Luneta Hill a nakaipatakderan ti SM City Baguio.

Impakdaar dagiti pagadalan ken sibiko a grupo ditoy ti isusupiatda iti nasao a proyekto babaen kadagiti streamers ken paskil.

Nangirusat met ti Baguio Community of Volunteers Movement iti bukodna a petision a pannakaideklara ti nasao a lote agraman dagiti sabali pay a kabakiran ditoy siudad a Green Urban Zone tapno masalakniban dagitoy kadagiti proyekto ti gobierno ken pribado a kompania.

   Iti plano nga insubmite ti SMIC iti konseho ti siudad, naisingasing ti pannakapukan wenno pannakaiyalis ti aganay 313 a kayo ti saleng tapno madalusan ti maysa ektaria a lote para iti pannakaipatakder ti dua a condominium a pasdek.

Ngem kinuna ni Mayor Reinaldo Bautista, Jr. a nupay kayatda ti proyekto, dinawatda ketdi a ti laengen Baguio Convention Center ti pasayaaten ti SMIC wenno iti kaarrubana a paset a saan ketdi a mapukan dagiti kayo a saleng.

Kinuna pay ni Bautista a saanda pay a sarurongan ti kampania ti BCVM a mangideklara iti nasao a lugar a Green Urban Zone agsipud ta kayatda pay nga ammuen no sino a talaga ti akindaga iti kasalengan iti Baguio Convention Center.

Maipalagip a ginatang ti gobierno ti siudad ti daan a convention center iti P250 milion manipud iti GSIS. Ngem mapapati a naglibtaw ti siudad a mangbayad iti balanse a P200 milion a nangipangtaan ti GSIS a pasublienna ti BCC.

Kinuna ti mayor a kiniddawen ti siudad iti Department of Environment and Natural Resources ken iti Land Registration Authority a kitaenda no kasano a natagikua ti GSIS ti kasalengan a lote.

Mapapati a karaman laeng ti sanikua ti GSIS ti katurodan iti likud ti convention center a paggigianan dagiti squatters iti agdama.#

 

Comments are closed.