Footer

BANNER: Presio ti lana, panaglulukat ti klase, trinatar da PGMA, Gabinete iti ibibisitana iti LU

La Union – Ti agtultuloy a panagpangato ti presio ti lana ken ti panagsagana iti masungad a panaglulukat dagiti pagadalan dagiti kangrunaan a trinatar dagiti kameng ti Gabinete ni Pres. Gloria Macapagal-Arroyo bayat ibibisitana iti rehion ditoy itay Mayo 27.

Iti panagsaritana, kinuna ni Arroyo makaapekto ti nangato a presio ti lana ken basic commodities kadagiti nakukurapay, isu nga iti laksid nga awan ti kontrol ti gobierno itoy a banag, agtultuloy ti panaggarawda tapno maksayan ti bakbaklayen dagiti umili.

Insamira ti Presidente a sinango ti National Economic and Development Authority (NEDA) ken National Anti-Poverty Council (NAPC) Cabinet groups tapno tratarenda ti problema ti panagpangato ti presio ti lana ken iti panaglukat ti klase iti Hunio bayat ti agtultuloy a panangidanon ti Palasio kadagiti relief goods kadagiti naapektaran iti napalabas a Bagyo Cosme.

“Kissayantayo ti taripa. Mangtedtayo iti cash payments kadagiti poorest of the poor a pamilia kas tulong ken iyendorsotayo iti Kamara ti Consumer Bill of Rights tapno maprotehiran dagiti umili,” kinuna ti Presidente.

Dinagdag ni Pres. Arroyo ti Departamento ti Edukasion nga ileppasda ti pannakaipasdek ken pannakatarimaan dagiti pagadalan, pannakaidanon dagiti libro ken pannakairuar ti kasapulan a pondo para iti scholarship ken pautang kadagiti estudiante ti high school, unibersidad ken technical-vocational schools.

Dinawat ni Arroyo ti pannakikammayyet dagiti lokal a gobierno, kameng ti Kongreso, pribado a sector, NGOs ken amin nga umili tapno tumulongda iti panagrang-ay ti pagilian.(Mancielito S. Tacadena)

 

Comments are closed.