Footer

Mannalon ti Vigan, didan agmula gapu kangina kasapulanda iti talon?

VIGAN CITY – Linagidaw dagiti konsehal ditoy ti mapapati a saanen a panagmula dagiti mannalon ditoy siudad gapu iti kangina dagiti gatangenda a kasapulanda iti panagtalonda.

Iti privilege speech ni Konsehal George Villanueva iti session itay Mayo 26, kinunana  a gapu iti kinangina  ti presio ti ganagan, pagpatraktor ken gasolina, naupayen nga agmula dagiti mannalon iti siudad ket imbes nga igatangda ti puonanda kadagiti kasapulan iti panagtalon, usarenda  laengen a paggatang ti bagas.

Kinuna ni Villanueva a sumagmamano a mannalon ti nakapatpatangna ket ti kangina dagiti kasapulanda iti talon ti kangrunaan a saning-ida a pakaigapuan ti pannakaupaydan nga agmula.

Segun iti konsehal, sumagmamano a mannalon ti nangibaga nga imbes nga usarenda ti puonanda a gumatang kadagiti kasapulan iti panagtalonda, igatangda laengen iti bagas.

Indagadag ni Villanueva ti panangiwayat ti komite iti agrikultura tapno  matulongan dagiti taga-Vigan a mannalon ta no agsardengdan nga agmula, adda pangta a masagrap dagiti agnaed ditoy kangrunaan iti poblasion ti food crisis.

Dinakamatna dagiti kooperatiba kas iti Fatima ken Nueva Segovia Consortium of Cooperatives a mangtulong koma kadagiti mannalon iti problemada mainaig kadagiti kasapulanda iti talon babaen ti panangtedda iti livelihood assistance kadagitoy.

Ngem insungbat ni Konsehal Andres Adriatico, chairman ti committee on agriculture, a saan a nabaybay-an dagiti mannalon ta adda naiwaras kadakuada a bukbukel, ganagan ken dadduma pay nga agricultural inputs.

Sinarurongan ni Konsehal Herminigildo Apelin ni Adriatico a saan a binaybay-an ti gobierno ti siudad ti benneg ti agrikultura idinto nga indagadagna kadagiti  mannalon a tulonganda koma met ti city government  tapno mapasayaat ti serbisioda, saan ketdi a mangbutbuteng.

Inyopreser met ni Konsehal Loreto Quibilan a libre nga ipabulodna ti sprayerna iti siasinoman a mannalon nga agkasapulan.

Kabayatanna, kinuna ni Konsehal Benjo Verzoza a makaalarma a talaga ti ingingina amin a magatgatang ket insingasingna nga adalenda koma a nasayaat ti maipapaay a pondo iti agrikultura ta saan a makaumanay ti nailatang a  P1 milion a pondo.

Napag-aanamongan ti konseho a mapaayaban iti sumaruno a sesion ni Engr. Fortunato Bulao, National Food Authority  Manager, tapno malawlawagan ti problema iti bagas, ni City Environment and Natural Resources  Officer Glenn Concepcion, maipanggep iti organic fertilizer, ken City Welfare and Development Officer Celerina Agcamaran mainaig iti Bigasan ng Bayan. (Nemia Icari)

 

Comments are closed.