Footer

Nabibileg nga armas, naisuko; droga, nakumpiska iti panagsukisok

CANDON CITY – Sumagmamano a nabibileg nga armas ti insuko ti maysa a residente iti Barangay Oaig Daya ditoy sakbay ti panagrikisa ngem nagtuloy ti search operation dagiti polis iti pagtaengan ti suspetsa ket nakakumpiskada iti maiparparit a droga.

Nakasukal ti search team iti pagtaengan ni Ruel Ballocanag, 30, naasawaan, residente iti Oaig Daya ditoy, iti maysa a plastic sachet a mapapati a naglaon iti binulong ti marihuana nga addaan bunga, binulong ti marihuana a nabungon iti pagiwarnak, 2 nga open plastic sachet a naglaon iti binulong a marihuana nga addaan bunga nga agdagsen iti 19 gramo.

Sakbay ti panagsukisok, boluntario nga insuko ti suspetsa dagiti nabibileg nga armasna a pakairamanan ti maysa a cal. 30 US carbine, maysa a Colt baby armalite, gauge 12 shotgun, homemade back shot one pong, 7 a bala para iti gauge 12 shotgun, 1 magasin para iti armalite nga addaan 10 a bala ken 2 a bala para iti cal. 30 carbine.

Ngem intuloy ti search team ti panagsukisok a nakasukalanda kadagiti maiparparit a droga.

Sinaksian dagiti barangay officials a pakairamanan ni Barangay Captain Pepito Sanchez ti nasao a panagsukisok.

Binukel ti PNP ditoy siudad, Philippine Drug Enforcement Agency ken ti International Coordinating Advisory Grop (ICAG) nga indauluan ni  Police Chief Inspector Marlo Castillo, hepe ti polis, ti grupo a nagsukisok iti pagtaengan ni Ballocanag. (Danny Antalan)

Comments are closed.