Footer

Sarita: TI PILLAR TI ILIDA (Maikatlo a paset)

“Ur-urayennakan sa ta di met la makiasawan. Kunami a mapan agtuloy
nga agbasa tapno agsarakkayo idiay pagadalan ngem mangged kano laengen.
Isu nga adda idiay minas tatta,” impadamag ni ulitegna.

Ngem di nagun-uni ni Celia. Binay-anna lattan nga agsao ti ulitegna.

Third year high school ngamin ni Jerry idi nagsardeng nga agbasa. Ti dida ammo, bumisbisita ni Jerry iti dormitory da Celia no aldaw ti Domingo nga awan serrekna iti minas. 

“Apankami agekskursion idiay Tirad Pass inton Biernes,” binaliwan ni Maestro Badol ti patangan idi dina mauray nga agsao ni Celia. “Makikuyogkanton kadakami no kayatmo a bumakasion idiay iliyo.” 

“Nagsayaaten, Uncle. Umayakto man met sumurot. Asideg ti ilimi iti Tirad Pass ngem diak pay nadanon dayta a lugar,” kinuna ni Celia.

“Wen, a. Dagiti boy scouts ken girl scouts iti maikalima ken maikanem a grado ti kuyogenmi. Kayatda kano a makita ti nakatayan ni Gregorio del Pilar,” panangilawlawag ni Maestro Badol.

Parbangon pay laeng iti aldaw ti Biernes idi agluas dagiti agekskursion a nakikuyogan ni Celia. Dua ti maestro ti kadua ni Maestro Badol a nangkuyog kadagiti ubbing – ni Mr. Tipag nga adviser ken Mr. Kontip a scout master. Siam ti boy scouts ken innem ti girl scouts.

Naragsak ti panagdalia-satda ta di agsarday ti panagkanta dagiti ubbing iti scouting songs. Nakipagkankanta met ni Celia ta ammona dagiti kanta.

Tapno di unay mabannog dagiti ubbing, naginanada iti sirok dagiti narukbos a kayo iti igid ti dalan. Pamrayan metten ti scout master a manglecture kadagiti ubbing babaen ti compass nga iggemna no sadino ti daya, laud, abagatan wenno amianan a direksion. Saludsodenna no dino a banda ti naggapuanda ken no dino ti turongenda. Ken dadduma pay.

Iti agarup alas singko iti malem, nakadanonda iti waig nga asideg iti ruar ti barrio.

“Aginanatayo pay ditoy. Kalpasanna agdidigostayo,” kinuna ni Mr. Tipag kadagiti ubbing.

“Yes, sir!” nasaranta a sungbat dagiti ubbing.

Intuloyda manen ti nagna, kalpasanna. Kas iti dati, nasaranta dagiti ubbing a nagkankanta kadagiti scouting songs bayat ti pannagnada. Insar-engda ti panagkantada idi sumungaddan iti wangawangan ti barrio ta addaytan dagiti tumanaol nga aso iti masungadanda a balbalay. 

NADANONDA nga agtataep iti kabbayo a bagas ni Nana Petra nga inang ni Celia. Inarakup ni Celia ti inana. Inyam-ammona dagiti kakuyogna malaksid ni ulitegna. Linamano ni Maestro Badol ni Nana Petra a kasinsinna.

“Ne, apay metten a kakuyogyo ni Celia?” masmasdaaw ti baket a nangtaliaw ken ni Maestro Badol.

“Simmurotak ken ni Cisca a nagbakasion idiay Masla, inang. Ket gapu ta nagpakastoy da Uncle, simmurotakon a,” kinuna ni Celia.

“Ay kasta?” kinuna ni Ina Petra a nakaranraniag ti rupana iti ragsakna a makakita iti anakna ken dagiti kakuyog daytoy. Pinaulina dagiti kasang-angpet.

“Komusta, kasinsin. Imbag man ta nagpasiarkayo, ken adda pay ubbing a kakaduayo,” kinuna ni Nana Petra idi nakatugawdan.

“Wen, manang, ta apanmi ipasiar dagitoy ubbing idiay Tirad Pass,” kinuna ni Maestro Badol a mangpapaid iti bagina babaen ti kallugongna. 

“Nasayaat  man, maestro, ta umayyo met pasiaren daytoy nanumo nga ilimi,” iniseman ni Nana Petra  dagiti maestro.

“Ni Manong, manang?” sinaludsod ni Maestro Badol.

“Hay, itay pay la parbangon a napan dita bantay. Apan kano agsiim. Adda met nangngeg a kanalbuong itay alas tres tay malem. Bareng a no adda naanupanna,” insungbat ni Nana Petra. “Kasibsibet ngarud dagitay babbaro a napan nangsurot kaniana,” innayonna.

“Ay, sigurado la ketdi nga adda naala ni kayong, Manang, no kasta nga adda nagkanalbuong,” kinuna ni Maestro Badol. Sinangona dagiti kaduana. “Sigurado ti kilawentayo nga ugsa no madamdama, pare,” kinuna ni Maestro Badol kadagiti kakaduana a maestro.

“Aya! Kasano nga ammom, sir?” saludsod met dagitoy.

“Ammoyo, pare, mangnganup ngamin ni kayong. No mapan dita bantay a tugotna dagiti aso ken ti paltogna ket adda kanalbuong a mangngeg, sigurado nga adda naanupanna. Ammok dayta ta um-umaykami idi ubbingkami ditoy. Awan mintisna a kasta ti mapasamak no agpabantay ni kayong,” panagpalawag ni Maestro Badol. “Ken, believe it or not, no adda naalana ket kayat pay ni kayong ti apan agsiim, bilinenna dagiti asona a mangbantay iti naanupanna.”

“Is that so?” naggiddan nga insawang da Mr. Tipag ken Mr. Kontip.

“Kasano ngay nga ammo dagiti mangsurot kenkuana ti ayanna?” sinaludsodda.

“Babaen ti asuk ken taol dagiti aso,” kinuna ni Maestro Badol.

“Nangngegyo daydiay, ubbing?” sinango ni Mr. Kontip dagiti ubbing.

“Yes, sir!” nasarangsang nga insungbat dagiti ubbing a dumdumngeg iti panagpapatang dagiti tallo a maestroda.

“That’s scouting!” innayon ti scout master.

Iti saan a mabayag, addan dagiti nakaawit iti ugsa a sangaan ti sarana.

“Ania, agpayso tay kunak ket,” siraragsak ni Maestro Badol a nangsabat ken kayongna.

           (Maituloyto)