Footer

1 natay, nablo ti sabali iti aksidente

SAN ESTEBAN, Ilocos Sur –  Natay bayat ti pannakaagasna iti ospital ti maysa a balo idi naaksidente iti sanguanan ti sementerio iti barangay San Nicolas iti daytoy nga ili idinto a nablo ti sabali a tao pannungpar iti national highway a sakup ti Olo-olo Norte, Santiago, Ilocos Sur.

Nainaganan ti natay a ni Jimmy Vidal y Cabang, Sr., 43 ,  balo, ken residente iti Barangay San Nicolas ditoy.

Iti inbestigasion ti polis ditoy, naammuan nga agturturong ti Honda Wave a minaneho ti biktima iti abagatan a direksion ngem napukawna ti kontrolna iti manibela iti nagkurbaan a puon ti nakaikrasanna.

Naitaray ti biktima iti  Candon General Hospital ngem natay bayat ti pannakaagasna.

Kabayatanna, dinungpar ti Ford Excursion a minaneho ni Victor Dacuycoy y Natividad, residente iti San Andres, Bacarra, Ilocos Norte ti SLF FX a minaneho ni Romeo Apellido, residente iti Lemo, Dupax del Norte, Nueva Vizcaya iti national highway a sakup ti Olo-Olo Norte, Santiago.

Mapapati a saan a nakita ni Dacuycoy ti lugan ni Apellido a nakasardeng gapu iti trapiko iti masimsimpa a kalsada ket nadungparna ti kutit ti FX a puon met ti nangdungparan daytoy iti Isuzu Elf a minaneho ni Mario Quitevis, residente iti Dan-ar, Santiago, Ilocos Sur.

Nablo ti pahinante a nakalugan iti FX.#

Comments are closed.