Footer

BANNER NEWS: Saan a maipangato ti tuision kadagiti SUCs: CHED

SAN FERNANDO CITY – Lumag-an ti rikna dagiti estudiante ken nagannak ta saan a maipangato ti tuision fee kadagiti unibersidad ken kolehia ti gobierno iti daytoy panaglukat ti semestre.

Kinuna ni Nona Ricaforte a naggapu ti pammilin a  panagtalinaed ti singiren   iti tuision dagiti amin nga state universities ken colleges iti pagilian manipud iti Commission on Higher Education (CHED).

Ni Ricarfore ti nangibagi ken ni CHED Commissioner Romulo Neri iti cabinet meeting a nakairamanan ti National Economic Development Authority ken National Anti-Poverty Council (NEDA-NAPC) a naangay iti daytoy a siudad itay nabiit.

“Kadagiti estudiante a nakabayaden iti naipangato a tuition fee, mai-refund wenno maikredit para iti sumaruno a semestre,” kinuna ni Ricaforte idinto a nagapela kadagiti pribado a unibersidad ken kolehio a sumurotda iti pammilin ti CHED.

Inlawlawag ni Ricaforte a nakurang laeng a 10 porsiento iti 111 nga SUCs  idinto nga aganay a 10% laeng kadagiti 1,800 a pribado a pagadalan ti nagipangato iti tuision, adayo a nababbaba ngem iti panaglulukat idi 2007-2008.

Idi napan a panaglulukat, 20% kadagiti kadagupan a bilang dagiti unibersidad ken kolehio ti nagipangato iti tuision.

Indagadag ni Ricaforte kadagiti estudiante a no saanda a kabaelan ti agbasa iti pribado a pagadalan, sumrekda kadagiti state universities wenno colleges wenno umasidegda iti CHED.

Kabayatanna, impakaammo ni Department of Education Secretary Jesli Lapuz nga adda nabuangay a 1,818 a puesto para kadagiti head teachers a maipromot kas prinsipal.

Kinuna ni Lapuz a maysa daytoy a record breaker iti maysa a sibubukel a tawen.

“Aganay a 60% kadagiti pagadalan iti pagilian ti awanan iti prinsipal ket napapanawen a maital-on dagiti head teachers,” kinuna ni Lapuz.#

Comments are closed.