Footer

Overseas Workers Family Circle, agpaay a support group dagiti OFWs: Mayor Medina

VIGAN CITY – Kinuna ti mayor ditoy nga adda psychological impact iti pamilia dagiti overseas workers iti pannakaiyadayoda kadakuada ket kasapulan nga adda suporta ken kagrupoda ditoy a kabinnuligda iti livelihood ken legal assistance.

Kanaig daytoy, impakaammo ni Mayor Eva Marie S. Medina a nabuangayen dagiti chapter ti Overseas Workers Family Circle tunggal barangay ditoy siudad idinto nga imbatadna a “nagdakkelan (daytoy) a gunglo ken nagpintas” para kadagiti agsublin nga OFW ken dagiti saandan a kayat ti agsubli pay iti ganggannaet a pagilian ket “agtitinnulongda iti nadumaduma a problema dagiti OFW”  iti livelihood ken legal nga assistance.

“Ti importante unay, adda support group(mo),” kinuna ni Medina idinto nga inyunay-unayna a  “narigat ti maisina iti pamiliana, narigat ti maiyadayo… dimo ammon ti maar-aramid kadakuada…” (ket) “adda psychological impactna” kadakuada.

“Narigat ti pamilia nga agsina… saan a rumbeng a ti pamilia agsisina ngem gapu iti rigat ti panagbiagda, agbirokda iti pagsapulanda (iti ballasiw-taaw) tapno maitedda ti pagkasapulan ti pamiliada,” kinuna pay ti mayora bayat ti interbio kenkuana ni Peter Rebunal a naipatangatang iti programa ni Jun Ramos a Commando Brigada iti DWRS.

Kinuna ni Medina nga iti parte dagiti nabatbati a pamilia dagiti OFWs, uray paw-it a paw-it dagitoy, no saanda met nga ammo nga ibaut ti kuartada, isu nga “importante nga adda gunglo a kastoy tapno adda maiwayattayo a trainings para dagiti pamilia dagiti overseas workers “tapno saan a masayang ti trabahoda.”

Kinuna ti mayora nga “eventually, ti kayattayo, no mapadakkelda (met) ti negosioda, agsubli (met laeng) dagiti ipatpategda tapno agtitiponda met laeng.”

Kinuna ni Medina a “saan a normal a situasion a ti pamilia, agsisinada” idinto nga innayonna nga ultimate goal a kayatna a magun-od ti bumasbassit a bilang dagiti mapan mangged iti ballasiw-taaw ken ad-adu a bilang nga agtalinaed ditoy tapno makapagnegosioda laengen.

Kinuna ni Medina nga impakaammona kadagiti kameng ti gunglo a malaksid iti livelihood program ti city government para kadakuada, adda pay mabuangay nga skills training institute “a maysa pay a sanggirtayo tapno maikkan iti adal ti pamilia dagiti overseas workers” ken kasta met dagiti returning overseas workers “tapno maikkanda iti bileg a makapagnegosio iti kabukbukodanda.”

Kinuna pay ni Medina a no dakkel ti gunglo, napigpigsa ti bosesda a mangirupir iti kalinteganda.

Innayonna nga inruanganna ti posibilidad a mabalin a tulongan ti gobierno ti siudad ti gunglo no adda parikutda mainaig iti legal a banag.#