Footer

Pannakapaadu dagiti boy scouts, indagadag ti BSP national president

Vigan CitY – Kinuna ti mayor ti siudad ti Makati nga agdepdepende ti gunglo dagiti boy scouts iti Department of Education para iti rehistrasion dagiti kameng isu a masapul nga agawis kadagiti agmiembro manipud kadagiti agduduma a gunglo.

 “Agdepdependetayo ita iti DepEd para iti rehistrasion ti boy scouts isu a masapul nga agkutitayo tapno makaawistayo iti agmiembro manipud iti agduduma nga organisasion,” indagadag ni Mayor ti Makati City Jejomar Binay.

Timmabuno ni Binay, national president ti Boy Scouts of the Philippines, iti joint executive meeting ti national council ken ti Ilocos Sur Boy Scouts Council a naangay iti provincial capitol itay Mayo 29.

Kinuna ni Binay a mabalin nga usaren ti kabaruanan a teknolohia kas iti website wenno portal iti panagawis kadagiti mayat nga agmiembro iti BSP.

Kinunana nga agap-apela ti gunglo nga idadauluanna kadagiti agduduma nga organisasion tapno maikkanda iti gundaway a mangilawlawag iti programa ti scouting movement karaman ditan ti panagmiembro dagiti babbai iti BSP.

Impatalged met ni BSP Ilocos Sur Council Chairman Deogracias Victor “DV” Savellano a madadaan a makitinnulong iti aniaman nga addang ti BSP agsipud ta mamati a  maysa a wagas ti scouting tapno maisuro dagiti napintas a kababalin kadagiti ubbing ken agtutubo .

Bayat ti miting, naiyawat iti BSP Ilocos Sur Council dagiti agduduma a pammadayawna, kas iti best in performance, most number of obtained Cavaliers ken 1st runner-up iti Cub Scout registration and recruitment iti Rehion I.

Iti agdama, agdagup iti 17,691 dagiti rehistrado nga scouts iti Ilocos Sur, ngimmato iti 8% no maidilig iti 16,467 a miembro idi 2006. Karaman ditoy ti 229 a Kid scouts; 8,692 a Cub scouts; 7,241 a Boy scouts; 1,477  a Senior scouts ken 212 a Rover scouts.

Target ita ti council a makaawis pay iti ad-adu a miembro tapno madanonda ti 25,000 a kameng iti sumaganad a tawen.#

Comments are closed.