Footer

Petition ti TODA a mangingato iti plete ti traysikel, awan ti nangkontra

VIGAN CITY – Mannakaawat dagiti nadumaduma a sektor ditoy ta kimmanunongda amin a maipangato ti singir ti plete ti traysikel kas petision ti gunglo dagiti agpaspasada iti daytoy a siudad.

Iti naangay a public hearing iti city hall itay Hunio 4, nagkaykaysa dagiti nadumaduma a sektor a pakairamanan dagiti estudiante, nagannak ken dagiti commuters a kimmanunong iti petision ti Tricycle Operators and Drivers Association ditoy siudad a nangkiddawanda ti pannakaipangato ti singir ti plete ti traysikel.

Dinawat ti TODA a maipangato ti plete manipud iti P8 iti P10 gapu iti ingingina iti gasolina ken spare parts ti traysikel gapu iti isusuyop ti presio ti lana iti sangalubongan.

Maipalagip nga idi laengen 2005 a naipangato ti singir ti plete iti traysikel.

Nailanad pay iti petision dagiti traysikelan a sadanto laengen agkinddaw iti fare increase no agbalin a P50 ti bayad ti maysa a litro ti gasolina.

Itay nabiit, limbes iti P50 ti presio ti gasolina tunggal litro.

Nupay awan ti nangkontra iti petision ti TODA, naidukit dagiti adu a reklamo maikontra kadagiti sumagmamano nga agpaspasada, kas iti kinabastosda, saan a nasayaat a panagkawes, panagsigarilioda bayat ti panagpasadada, panagpilida kadagiti iluganda ken iti panagsingirda iti nalabes, aglalo no maymaysa ti pasahero.

Natratar dagitoy a problema iti tricycle summit a naangay idi napan a tawen.

Naipakaammo bayat ti public hearing nga addan dagiti drop boxes a naiwaras iti siudad a pakaipisokan kadagiti nadumaduma a reklamo maikontra kadagiti traysikelan.

Manamnama a trataren ti konseho ditoy iti sumaruno a session ti petision ti TODA.#

Comments are closed.