Footer

Regular a biahe ti PAL iti Vigan City, naikiddaw

Vigan City – Kinuna ti bise mayor ditoy a maidur-as ti turismo iti siudad ken panggedan no adda regular a biahe ti eroplano ditoy a siudad.

Kinuna ni Vice Mayor Franz Ranches a malaksid a maital-o ti turismo iti siudad, maparnuay pay dagiti panggedan no matuloy ti panggep ti Philippine Air Lines a manglukat iti biahena a Vigan-Manila babaen ti 50-seater nga eroplanona.

“Bigbigbigentayo a ni Mr. Lucio Tan, agnegnegosio met iti City of Vigan, kasta met nga adopted son ti probinsia ti Ilocos Sur, ngarud apay a saan a kiddawen ti pammalubosna a mapaadda ti commercial regular flight ti PAL iti siudad ti Vigan?” kinuna ni Ranches.

Inaprobaran  ti sangguniang panlungsod ditoy itay Hunio 2 ti maysa a resolusion a mangkiddaw ken ni Lucio Tan, chairman ti Philippine Air Lines (PAL) a maluktan ti regular a biahe a Vigan-Manila babaen ti nasao nga air line.

Sakbayna, bimmisita ditoy  dagiti representative ti Philippine Airlines ket  sinurbeyda da ti Mindoro airport tapno kitaenda ti  posibilidad a pannakalukat ti biahe ti PAL manipud iti  Manila nga agtunged ditoy siudad.

Kinuna ni Ranches a gapu iti daytoy nga ibibisita dagiti pannakabagi ti nasao nga airline iti siudad, napanunot ti konseho ti mangipasa iti resolusion a mangkiddaw ken ni Tan iti pannakalukat ti biahe ti PAL ditoy Vigan ken Manila.

Kinuna ni Ranches a saan a maatiw ti eropuerto ti Mindoro no maidilig kadagiti sabali nga airport iti pagilian kas iti eropuerto iti Bohol, Dipolog ken Iloilo.

Segun iti bise mayor, nakasagana dagiti baro nga eroplano ti PAL a 50-seaters a dati a maus-usar iti Manila-Boaracay flight no maluktan ti biahe a Manila-Vigan.

Maipalagip a maysa ni Tan a kadakkelan iti negosio ti tabako ditoy siudad ken naayat a tumultulong babaen ti imatmatonanna a Tan Yan Kee Foundation.#