Footer

Sarita: TI PILLAR TI ILIDA (Maikapat a Paset)

Intuloyda ti simmang-at tapno agbirokda iti napintas a paglinongan ken pagipatakderanda iti kampoda. Timmulong ni Celia a nangipatakder iti kampoda a babbai.

Nagtitinnulonganda ti nangisagana iti pangrabii kalpasan a naipatakderda ti pagturoganda. Saanda a narigatan a nangisagana iti pangrabii ta adu ti impabalon da Tata Idong ken Nana Petra a naluto ken saan a karne ti ugsa ken alingo.

Naragsak di damoda a rabiida iti Tirad Pass. Namirit ti langit kadagiti bituen ken nasellag ti bulan a kas man la dinanggayanda ti naragsak a rabiida. Nangisayangkatda iti bassit a programa iti sibay ti campfire. Anian a ragsak dagiti ubbing. Pinagkantada met ni Celia iti namindua. “Naminsan a rabii, naslag diay bulan” ti immuna a kinantana ken “Biag ti mannalon” ti maikadua.

Naragsakan met a nagbuya da Tata Sikil ken tay maysa a polis nga impasurot ni mayor kadakuada.

NAKARIING ni Maestro Badol gapu iti lamiis a mariknana. Inirutanna ti dalikepkepna ta sumarut ti lamiis a mariknana.

“Agriingkayon, Celia, sika a pillar daytoy nga ili, ta inkayo agluto iti kape ta bareng maep-ep ti lamiis!” impukkaw ni Maestro Badol manipud iti bangir a tolda. Adda met da Celia ken dagiti babbai nga scouts iti bangir a tolda.

Ngem malam-ekda met isu a dida bimmangon a dagus. Nagiinnarasaas ketdi nga agiinnestoria dagiti ubbing. Nangngeg ni Maestro Badol ket nagsao manen.

“Ania pay la ti pagiinnarasaasanyo dita?” Bugkawen ti timek ti ulitegna a maestro. “Kasta pay ti pillar ti ili a kunada! Pillar ti ilida kano!” intanabutob ti maestro.

Nangngeg ni Celia ngem saan a nagun-uni. Bimmangon ket napan nagluto iti kape nga impabalon dagiti dadakkelna.

NAGMALMALEM a nagpasiarda iti umuna nga aldaw iti kakaykaywan iti bantay, aglalo iti naglikmut ti nakaisuratan iti tanda iti pannakiranget ken ipapatay ni Gregorio del Pilar iti dayta a disso. Dinalusanda ti naglikmut ken dimngegda kadagiti estoria ni Tata Sikil maipanggep iti Tirad Pass iti panaginanada.

Nasinada iti dua a grupo – grupo dagiti lallaki ken grupo dagiti babbai. Intuloyda ti nagdakiwas a nagbirok iti atap nga orkidias.  Simmurot ni Mr. Tipag kadagiti babbai.

“Sir, apay a dakami ti surotam, saan a dagiti lallaki?” dinamag ni Celia.

“Amangan no matnag diay pillar ti ili ket madadael,” inrabak ti maestro.

“Maysaka met, sir!” ket inlayat ni Celia ti iggemna nga orkidia.

“Please don’t! Sayang dagita!” sinarapa ni Mr. Tipag dagiti inlayat ni Celia nga orchids nga iggemna. “Nagrigrigatak nga inuli dagita, wen!” agkatkatawa ni Mr. Tipag a nangiggem iti ima ni Celia ket alaenna koma dagiti orchids.

“Ni kukuam laeng!” kinuna ni Celia ket indissona iti sango ti maestro sa napan nagtugaw iti rabaw ti dakkel a bato. Nagpannimid ket malmalday a nangibato ti panagkitana iti adayo. Lumablabbasit ti napudaw ken nalinis a pingpingna gapu iti pudot.

Impagarup ti maestro a gimmura ni Celia, ngem  dagiti imbalbalakad da Mayor ken dagiti lallakay a kaduana ti pampanunoten daytoy. “Ania ngata ti kayatda a sawen iti pillar ti ili? Ken apay ngata a kasta unay ti rurod ni Uncle iti sinaoda?”

“Ne, awitem daytoy ket nabannogsan ni Celia a mangaw-awit,” natimudna a kinuna ni Mr. Tipag iti maysa kadagiti ubbing a babai a kaduada.

Idi kuan, nagpagnapagna nga agsagsagawisiw ti maestro iti sango ni Celia. Tumangtangad kadagiti natayag a kayo bayat ti panagpagnapagnana.

“Look, Celia, look! Look at those beautiful flowers up there. Look, girls!” bigla a nagsao ken itudtudona iti ngato.

Bigla a timmakder ni Celia iti nagtugawanna iti kigtotna, “Yanna, yanna ti dakkel nga uleg?” sinaludsodna a makarkarattot.

Nagkakatawada amin gapu iti sinao ni Celia. Intudoda dagiti nadumaduma ti marisda a sabsabong iti ngatuenda.

“Hay, naku! Kunak la ket no dakkel nga uleg ti ibagbagayo itayen!” sinarapana ti barukongna nga agtibtibbayo pay laeng iti pannakakigtotna.

“Dagita nagpipintas a sabong ti kunak,”  ket intudo ni Mr. Tipag dagiti sabsabong.

“Ay, wen, nagpipintasdan! Maalam ngata ida, sir?” inkarit ni Celia.

“Gapu kenka, uliek,” insungbat met ti maestro sana inggidato nga immuli a nangpuros kadagiti sabong.

Naragsakan dagiti ubbing ta napunas ti naliday itay a langa ni Celia.

Intuloyda ti nagbirok kadagiti orchids. Malemen idi mangngegda ti sultip ni Maestro Badol. Gapu ta nagsisinada, nagsultip ni Mr. Tipag. Nagtataray dagiti ubbing nga immasideg. Nagsublida iti kampo. Nadanondan ditoy ti grupo dagiti lallaki nga scouts.

“Addakayo aminen?” sinaludsod ni Maestro Badol.

“Yes, sir!!!” naparagsit ti sungbat dagiti ubbing.

KALPASAN  ti pangrabii, nagaramidda manen iti bonfire. Imbaga ni Maestro Badol a tunggal maysa, ibagana dagiti naaramidanna iti nagmalem. Naragsak met dagiti ubbing a nagestoria kadagiti napasaranda.

Palpaliiwen met ni Celia ti ulitegna. Salsaludsodenna iti bagina no apay a kasta unay ti rurod ti lakay iti sinao dagiti lallakay iti ilida.

Idi nalpas ti panagestoria dagiti ubbing, sinango ni Maestro Badol ti kaanakanna.

“Sika met, pillar ti ilida, ania ti inaramidmo?” sinaludsodna.

Insalaysay ni Celia ti pannakakigtotna. Nagkakatawada amin. Nasiputan ni Celia ti ngirsi ni Maestro Badol ken ti panagtuprana a kagiddan ti panagdayamudomna. Ngem dina impadlaw a nakitana ti inaramid ti ulitegna.

       (Adda tuloyna)

Comments are closed.