Footer

EDITORIAL: Nasaysayaat nga edukasion manipud iti text messaging

Saan a malibak a dagiti Filipino ti kalaingan nga agteks iti sangalubongan gapuna a nabirngasan toy pagiliantayo a text capital iti lubong. Dakkel ti mapaspastrek dagiti telecommunication companies ditoy pagilian babaen laeng dagiti ginasut a milion a text messages nga ipatpatulod dagiti kailian iti inaldaw-aldaw.

Iti kallabes, adda gandat a mangbuis kadagiti text messages tapno manayonan ti pamastrekan ti gobierno. Ngem saan a naituloy daytoy a gandat gapu iti yaalma dagiti adda selponna.

Ita, adda manen gandat a mangibaba iti charges iti text messaging ken tawag, banag a nakaragsakan dagiti adda selponna agsipud ta dakkel a pakaibbusan iti load ti itatawagda ken  panagipatulodda iti text messages.

Ngem sabali ti agay-ayuyang iti panunot ni Sen. Richard Gordon: saan a maipabassit ti charges iti text messages no di ketdi mataginayon ngem sumrek iti kaha ti gobierno ti kagudua ti singsingiren dagiti telcos a charges.

Kinuna ni Gordon a no maikkat a maminpinsan dagiti charges iti text message, dakkel a pakadangranan dagiti telecommunication companies.  Insingasingna ketdi a mataginayon ti P1 a charge tunggal text message ngem sumrek iti kaha ti gobierno ti P.50 tapno maurnong dagitoy para iti pannakaipasdek iti maysa nga espesial a pundo a maaramat para iti pannakaital-o ti edukasion, pannakapundo dagiti programa iti salun-at ken pannakaited iti ad-adu a benepisio kadagiti senior citizens ti pagilian.

Dakkel ti merito daytoy a singasing ni Gordon. No agipatulod ti nakurang a maysa a milion nga addaan selpon iti 10 text messages, makapastrek ti gobierno iti P18.17 bilion iti makatawen wenno P90.87 iti lima a tawen. Bassit pay ketdi daytoy agsipud ta ad-adu nga amang ti maipatpatulod a text messages iti inaldaw.

Idagadagmi ti panangsuportatayo iti gakat ni Gordon a mangbuangay iti special education tax fund agsipud ta maaramat daytoy para iti pannakapasayaat iti edukasion iti pagilian. Babaen ti pundo a mapaadda manipud kadagiti text messages,  makaipatakder ti gobierno  kadagiti pagadalan, makagatang kadagiti lamisaan, tugaw ken libro, mayempleo dagiti kabarbaro a mangisursuro ken  maipangato ti sueldoda, maipromot dagiti prinsipal a mangimaton kadagiti pagadalan ken mapakan dagiti agbasbasa iti elementaria iti uppat a bulan nga agtungpal iti ibabassit ti bilang dagiti malnourished nga ubbing a maysa kadagiti kangrunaan a gapu iti panagikkatda nga agbasa.

Awan ti makitami a rason tapno agkedked dagiti telecommunication companies iti daytoy a singasing ni Sen. Gordon. Babaen ti panangitedda iti kagudua iti P1 a singsingirenda iti text messaging kadagiti agtagikua kadagiti selpon, makatulongda iti dakkel iti gobierno iti pannakaipaay iti nasaysayaat a serbisio kadagiti tattao, nangruna dagiti marigrigat nga   agbasbasa.

Daytoy ti gakat a rumbeng a sertipikaran ti administrasion a prioridad a maipasa iti panaglukat ti Kongreso iti daytoy a Hulio.#

Comments are closed.