Footer

Kinamaingel ni Don Ysabelo Abaya, binigbig dagiti Candonians, agtuturay

CANDON CITY – Binigbig dagiti opisial ditoy ti kinamaingel ni Don Ysabelo Abaya bayat ti pannakaselebrar ditoy itay Hunio 12 ti maika-110 nga anibersario ti pannakaideklara ti panagwaywayas ti pagilian.

Kinuna ni Mayor Allen Singson a rumbeng laeng a bigbigen ti amin a taga-Candon ti panangibuis ni Don Belong iti bukodna a biag tapno mawayawayaan ti Candon idi panawen ti panangsakup dagiti ganggannaet.

“Awan ti makunatayo a bukodtayo nga ili no awan ni Don Belong,” innayon pay ti mayor.

Kinuna met ni Gob. Deogracias Victor “DV” Savellano a dayaw ti sibubukel nga Ilocos Sur ti kaadda ti maysa nga Ysabelo Abaya a nangideklara iti panagwaywayas ti Candon idi Marso 25, 1898, 79 nga aldaw sakbay nga indeklara ni Hen. Emilio Aguinaldo ti independensia idi Hunio 12, 1898 iti Cavite.

“Ditay koma liplipatan dagiti bannuartayo,” indawat pay ti gobernador.

Iti met biang ni Diputado Eric Singson, mamati a ti wayawaya a sagut ni Don Belong para iti Candon ti gapu nga adda ita naan-anay a progreso iti siudad.

Kinunana nga agbalin  koma nga inspirasion ti agdama a henerasion aglalo kadagiti agtutubo ti kinamaingel ni Don Belong.

“Kasapulan a kabuyog ti wayawaya ti panagrang-ay kas kalikagum ti gobierno,” kinuna pay ti diputado.

Bayat ti panangidaton dagiti opisial dagiti sabong iti monumento iti plasa ti siudad, insalaysay ni Albert Abaya, kaasitgan nga an-annabo daydi Don Belong, ti pakasaritaan ti bannuar.#

Comments are closed.