Footer

SALAYSAY: Agannad: baka sika ti sumaruno a biktimaen dagiti manangallilaw (Maikapito a paset)

Agraira ita ti panangallilaw babaen ti loteria wenno paripa iti internet. Manipud itay umuna a bulan daytoy a tawen, aganayen a tallupulo ti simmangpet iti email addressko a naggapu kadagiti saanko nga am-ammo a tattao ken kompania a nangibaga iti panangabakko iti lottery.

 

Makapanganga ti kinadakkel ti premio nga inabakko (kano): minilion a doliar, sterling pounds ken Euro. 

Idi damo, saanko nga intaltalek dagitoy a surat-pakaammo a kellaat lattan a nagparang iti emailko ket dagusek a punasen amangan ketdi no adda nakadulin kadakuada a virus ket dinto agkras ti kompiutermi.

Ngem idi inkeddengko ti mangsurat iti salaysay mainaig iti daytoy a panangallilaw kadagiti tattao babaen ti internet, inurnongko dagitoy kas paset ti panagsukisokko no kasano a maallilawda dagiti puntiriada a biktimaen.

Idi Abril, nagburnok dagiti simmangpet iti emailko a nagkuna a nangabakak iti loteria. Agasem, agsangapulo a waragawag a nangabakak, saan met laeng a ginasut no di ket minilion a doliar, pounds wenno Euro! No maukkon dagitoy nga inabakko, rimbawak la ketdi da Lucio Tan, Henry Sy, ken dagiti bilionario a negosiante iti pagilian!

Adtoy dagiti sumagmamano a simmangpet iti emailko.

Manipud ken ni Dr. Harry Raymond, Foreign Services Manager, Payment and Release Order Department, Claims Processing Lottery Agent, Trans-Atlantic S.A London, United Kingdom, insuratna a nangabakak idi Abril 2008  iti £1,532,720 (one million, five hundred and thirty two thousand, seven hundred and twenty pounds sterling) iti lotttery nga inangay ti UK National Lottery, maysa nga Online Sweepstakes International Program, .

Nagsurat idi Abril 13 ni Stella Hollad, Promotions Manager ti Monthly Programe, a nangabakak iti  £2,000,000 GBP ket indagdagna nga ipaw-itko met dagiti detalye a kasapulan tapno maipaw-itda ti inabakko.

Impakaammo ni Amanda Collin, coordinator,   a nangabakak iti £1,500,000 GBP manipud iti binulan a UK National Lottery Online Promotion ket imballakadna a kontakek ni Jakes Anthony  idinto nga isaganak dagiti sumagmamano a kasapulan para iti nadardaras a pannakaited ti premiok.

Sabali pay nga email ti naawatko idi Abril 20 manipud ken ni Jakes Anthony a nangabakak iti £1500,000 GBP manipud iti UK National Lottery.

Iti daytoy met la nga aldaw, Abril 20, nakaawatak iti email a naggapu iti maysa a Mrs. Blanca Fernandez, coordinator ti loteria,  a nangabakak iti US$950,000.00 iti naangay a Euro Million Lottery Award 2008. Kontakek kano ti maysa a Dr. Phillip Weeks, Banca Trust Agency Espana, Madrid Spain tapno maalak ti premiok.

Idi Mayo, nangabakak iti 1 million Euro iti naangay a Powerball Euro International 2008, segun ken ni Margaret Ferguson sana inyunay-unay a kontakek ni Peter Reymund iti email addressna.

Ngem daytoy ti mabalin nga ipatulod iti Guinness Book of Records gapu iti kinaisangsangayanna. 

Insurat ni Rose Wood, promotions manager, nga iti naangay a loteria ti UK Lottery International idi Abril 19, maysaak kadagiti “napagasatan” a nangabak iti  £1,000,000.00 GBP ket kontakek ni Mr. Pinkett Griffin babaen ti email.

Ngem idi Mayo, nag-email manen ni Mrs. Rose Woods a nangibagaanna a nangabak (manen) iti  £1.000.000 pounds iti naangay a UK Lottery Company ket kontakek ni Mr. Pinkett Griffin.

Idi Mayo 13, nangabakak iti 1,000,000 Euro iti Japan Jumbo E-mail Lottery a naangay iti London, United Kingdom, kuna ni Hirotaka Nakara sana imballakad a kontakek ni Jeffrey Rice iti telepono wenno babaen ti email para iti clearance ken payment ti premiok.

Awan pay dua a lawas, idi Mayo 23, nag-email ni Hirotaka Nakara a €1,000 000 ti inabakko iti Japan Jumbo Lottery ket kontakek ni claims officer David Moore tapno maruk-atan ti inabakko.

Siak ngatan ti kagasatan a tao ditoy lubong ta naminduaak la ngaruden a nangabak iti UK Lottery International, naulit a naminduaak a nangabak iti nagsaruno a naangay a Japan Jumbo Lottery idi Mayo!

       (Adda tuloyna)

Comments are closed.