Footer

15 kameng ti Cafgu, napadayawan

BANGUED, Abra – Sangapulo ket lima  a kameng ti paramilitary troop ti pinadayawan ti militar gapu iti pannakirupakda kadagiti kameng ti gerilia a komunista a nangraut iti maysa a military detachment iti Sallapadan itay nabiit.

 

Ni Sekretario ti Depensa Gilberto Teodoro, Jr. a mismo ti nangiyawat iti pammadayaw kadagiti 15 a kameng ti Civilian Armed Forces GeographicalUnit (Cafgu) iti seremonia a naangay iti headquarters ti Philippine Army 41st Infantry Battalion iti Tagodtod, Lagangilang.

Rinaut dagiti armado a tattao a mapapati a kameng ti NPA ti paramilitary detachment iti Gangal, Sallapadan iti alas siete ti bigat ti Hunio 7 ngem nakiranget dagiti militiamen agingga a dimteng ti reinforcement manipud kadagiti tropa ti gobierno.

Tallo a kameng ti NPA ti napapatay iti ranget idinto a nasugatan ti uppat a Cafgu ken maysa a soldado.

Nabigbig dagiti tallo a kameng ti NPA a da Melito “Ka Basbas” Tabaday, taga-Gacab, Malibcong, Abra, Anderson “Ka Tarzan” Simangen, taga-Tapayen, Alaoa, Tineg ken Edies “Ka Maso” Casay ti Mataragan.

Mapapati a dua pay a nagudas a gerilia ti binagkat dagiti kakaduada iti panaglibasda.

Mapapati nga aganay sangagasut a kemeng ti NPA ti nangraut iti detachment iti alas siete ti bigat ti Hunio 7 ket nagpaut ti rupak agingga iti alas tres ti malem.#

 

Comments are closed.