Footer

Dua ektaria ti sinakaban ti bandera a naiyukrad iti Baguio itay Hunio 12

Kunak no agpaen la ti singkuenta a katao ti naidarnap a bandera itay Hunio 12 iti alas 8:20 ti bigat ngem kimmurang ketdin ti track and field oval ti Baguio Atletic Bowl iti kadakkelna! Dua metten nga ektaria ti sinakabanna! Buyaen ti ladawan DITOY..

 

Dandani naggiddan a naiyukrad iti daytoy nga aldaw ti bandera ti Filipinas iti bandera ti Israel, ti kadakkelan a wagayway iti sangalubongan, a naiyukrad iti Gaza strip. Mismo a ni Grace Galindez-Gupana, nangpaaramid kadagiti dua a bandera, ti nangsaksi iti pannakaiyukradna iti Israel.

Daytoy ti kadakkelan a bandera ti pagilian a naiyukrad. Ta kasano koma nga iwagaywaymo  ti bandera nga  aglapad iti 200 a metro por 100 a metro wenno 20,000 a metro kuadrado a mangsakab iti dua  nga ektaria?

“Kasanoda nga inyukrad dayta nay?” nangngegko a saludsod ti maysa  kadagiti rinibu a masmasdaawan a nagbuya. Addakami iti sirok ti saleng a mangbuybuya iti panangikayab ti angin iti bandera ken ti pannakaisawsawna iti danum ken pannakaisagadna iti kapitakan a paset ti track and field. 

Nagtitinnulong dagiti aganay 600 nga empleado ti gobierno (nasional), estudiante, boys scouts, dagiti kameng ti PNP ken dagiti kameng ti Good News Community Church, nangorganisa iti pagteng, a nangiyukrad iti bandera.

“Mano ngata a panait ti nausarda a nangdait kadaytan, nay?” sinaludsod ti maysa a lakay sa nagkatawa.

Segun iti report ti organizer, agdagup iti sag-18 a rolio ti puraw, nalabaga ken asul a panait a naaramat. Immabut met iti 12 a rolio ti duyaw a panait a nausar para iti amarilio a pasetna.

Naaramid ti bandera iti 14,000 a yarda a Taffeta nylon ken 1,250 a yarda a satin para iti bituen ken init. Agdagsen  iti 3.8 a metriko tonelada, nagastos ti P30 milion iti pannakaaramid daytoy a bandera.

Ti Hallelujah Prophetic Global Foundation ti tinudingan ni Grace Galindez Gupana, chief executive officer ti ABS GEN Herbs International, a mangaramid iti bandera ti Filipinas.  Makabulan ti kapaut ti pannakaaramidna. Nailugan iti trak a six by six iti panangisang-atda iti siudad.

Naiyabay a naiyukrad ti bandera ti Filipinas iti kadakkelan a bandera iti lubong, ti bandera ti Israel a nairekord iti Guinness Book of World Records idi Nobiembre 25, 2007 sadiay Masada Israel. Kalaksidan a maysa nga airfield ti Masada, archeological/UNESCO heritage site a kas iti Vigan. Ngamin, adda ti Masada iti asideg ti Dead Sea, ti lugar a nakaipatakderan ti palasio dagiti ar-ari ti Hudeo kadagidi immuna a panawen a pakairamanan ni Ari Herodes. Dayta a lugar ti kaudian a nagtakderan ti maudi a depensa dagiti Hudeo iti panangribbuot kadakuada dagiti Romano.  

Dagiti mismo a kameng ti Guinness Book of World Record ti nangrukod iti bandera ti Israel nga agatiddog  iti 660 metro (2,165 pie) ken 100 metro (330 pie) a kaakaba ken agdagsen iti 5.7 a tonelada.

Nupay basbassit ti bandera ti pagiliantayo, imbayogna met ti nagan ti nasion iti panaggiddanda a naiyukrad, saan laeng nga iti nagan ti kappia no di pay iti Kristianismo.

Asino aya ni Gupana? Ken apay a nagaramid kadagiti nagdadakkelan a bandera a naggastosanna iti P30 million?

Sigud nga aglaklako iti fishball ni Gupana ngem nakaasawa iti Amerikano. Nangipatakderda nga agassawa iti herbal medicine ken paktoria itoy, ti ABS Herbs International.

Nalatak ti naganna a kas Sister Grace iti HalleluYAH PG Towers Ministries International, kas maysa nga ebanghelista.

Idi Setiembre 17, 2006, pinadas ni Gupana nga inyukrad ti bandera iti bakras ti bantay sadiay Aritao, Nueva, Vizcaya a dinar-ayan ti sangapulo ket lima ribu a katao ngem gapu iti napigsa a puyupoy iti dayta nga aldaw, napisangsang ti bandera.

 Apay a nagaramid kadagiti dadakkel a bandera?

“God spoke to me in thunder and lightning,” insungbat ni Galindez-Gupana kadagiti reporter ti Associated Press idi ininterbioda idi Nobiembre. “The Lord said, ‘Make the flag of Israel, the standard of my people.” 

Innayonna nga inaramidna dagiti bandera “…to honor 50 years of friendly relations between Israel and the Philippines .”

Kinuna ni Gupana nga inaramidna daytoy tapno  matungpal ti maysa a prophesy wenno padto: “Make the flag of Israel, the standard of my people…” Ti biblical basis daytoy ket masarakan iti libro ni Isaiah 11: 11-12, kuna met laeng ni Gupana.

Apay a napili ni Gupana a ti Baguio ti pangiyukradanna iti kadakkelan a bandera ti pagilian?

“With our prayers for almost a year and a half, the Lord spoke to us, saying: ‘How can I love you if you yourselves do not even love your country? The first thing that you should do is to lift your flag because it has a spiritual meaning’,”  kinuna ni Gupana.

Kinuna ni Gupana a kas panagayatna iti pagilian, pinilina ti Hunio 12,  pananglagip  iti maika-110 nga Independence Day, a panangiyukrad iti bandera iti Baguio City. Adda iti www.kamalig.blogspot.com ti ladawan ken video. #

 

Comments are closed.