Footer

Maika-63 nga anibersario Ranget iti Bessang, nalagip

TAGUDIN, Ilocos Sur –  Nalukaisan itay Hunio 14 ti maysa a marker iti nagsangalan ti dalan iti Barangay Bitalag ditoy  kas paset ti pananglagip iti maika-63 nga anibersario ti “Bakal iti Bessang”.

 

Indauluan ni House Deputy Speaker Eric D. Singson, Tagudin Mayor Roque  Verzosa, Jr., Veterans Administrator Ernesto Carolina ken Gen. (ret.) Arnulfo Bañez, National Commander of the United States Army Forces in the Philippines-Northern Luzon (USAFIP-NL), ti unveiling ti nasao a marker iti junction ti Bitalag ditoy kas baton-lagip iti napasamak a ranget iti nagbaetan dagiti soldado a Filipino ken dagiti Hapon idi Enero 8, 1945 a nagtungpal iti pannakarubbuot ti Bessang Pass nasurok nga uppat a bulan kalpasanna, idi Hunio 14, 1945.

Kinuna ni Singson a napateg ken napnuan pakasaritaan ken ti Tagudin junction agsipud ta maysa daytoy a naipangruna nga outpost dagiti Hapones a rinaut dagiti elemento ti 121st USAFIP-NL ken rinubbuotda iti las-ud ti uppat nga aldaw.

Iti pannakarubbuot ti Bitalag junction, sinunson dagiti soldado a Filipino babaen ti suporta dagiti kaaliadoda nga Amerikano dagiti Hapones a  nangipasdek iti maudi a sarikedkedda iti Bessang Pass, maysa nga akikid a sang-at a dalan iti nagbaetan ti dua a bantay, a sakup ti Malaya, Cervantes, Ilocos Sur.

Kinuna ni Singson nga iti pannakatnag ti Bessang Pass, napadaras ti isusuko dagiti Hapones kadagiti aliado a puersa.

Kinuna met ni Savellano nga ipalagip ti Bakal iti Bessang ti kinapateg ti patriotismo, wayawaya para iti kappia ken panagdur-as.

Ti Bessang Pass ti nagpaay a maudi a sarikedked ni General Tomoyuki Yamashita iti tartaraudin a paset ti gubat.

Iti Bessang Pass ti nakapasamakan ti maysa kadagiti kadaraan a rupak iti gubat a nakatayan ken nakasugatan dagiti aganay 3,400 a soldado.#

 

Comments are closed.