Footer

3.8 milion a mangmangged, mabenepisiaran iti RA 9054

SENATE – Pumigsa ti kabaelan dagiti aganay 3.8 milion a mangmangged gapu iti baro a linteg a pinutar ti Senado a mangilibren iti panagbayad iti buis dagiti makategtegged iti minimum ken pannakaingato iti tax exemption kadagiti sabali pay a mangmangged, kinuna ni Senate Presidente Manny Villar.

Kinuna ni Villar a P14.2 bilion ti kadagupan a pateg ti tax break para kadagiti mangmangged a “nasursurok ngem iti mabalin a gastuen ti gobierno iti panangitedna iti subsidy iti koriente, matrikula ken abono.”

Kinuna ti senador nga agbalin a kanayonan a matgedan ti mangmangged ti paset ti sueldona a dati a maik-ikkat kas buis ket isudan ti manggasto iti kuarta nga itedda koma iti gobierno idinto nga inyunay-unayna a nasaysayaat daytoy agsipud ta no ibayadna a buis iti gobierno, ti 30 sentimos kada piso ket pagbayad laeng ti gobierno iti utangna.

Kinuna pay ni Villar a masulnitan ti P14.2 bilion iti bulsa ken petaka dagiti mangmangged babaen ti baro ken pinasimple a sistema iti panagbayadan iti buis a makaawis kadagiti propesional, self-employed ken dagiti babassit a korporasion nga agbayad iti umno a buis.

Iti pattapatta ti Department of  Finance, babaen ti sistema nga optional standard deduction ti RA 9504, makaullom ti gobierno iti P15 bilion manipud iti nadumaduma a sektor a dandani saan a masingsingiran iti buis.

“Maibatay ti panagkolekta iti buis iti linteg ken kumplikado a sistema. Ngem mabalin babaen ti panagkolekta iti buis maibatay iti panangkonsensia ngem iti panangpilit ket lalo a maawis dagiti tattao a tungpalenda ti pagrebbenganda nga agbayad iti buis,” kinuna ni Villar.

Kinuna ni Villar a pinutar ti Senado ti linteg nga addaan iti panggep a mangbalanse dagiti kasapulan dagiti mangmangged a maikkatan ti ibaklay a buis ken ti mapastrek a kasapulan ti gobierno a busbosenna para kadagiti programa ti kagimongan.

“Kas resulta, naputar ti maysa a linteg a mangpapigsa iti purchasing power ti maysa nga indibidual ngem saan met a mangbangkarote iti estado,” kinuna ni Villar.#

Comments are closed.